وزیر اعلیٰ مریم نواز نے اسکولوں میں ’اسمارٹ کلاس رومز‘ منصوبے کا اعلان کر دیا

وزیر اعلیٰ پنجاب مریم نواز نے صوبے کے سرکاری اسکولوں کو اسمارٹ کلاس رومز اور ڈیجیٹل لیبز سے اپ گریڈ کرنے کے منصوبوں کا اعلان کیا ہے جو کہ روایتی تعلیم میں جدید ٹیکنالوجی کو شامل کرنے کی جانب پہلا قدم ہے۔

ڈیجیٹل لرننگ ڈے کے موقع پر گفتگو کرتے ہوئے وزیراعلیٰ پنجاب مریم نواز نے کہا کہ آج کی دنیا میں ٹیکنالوجی کی ترقی اور تعلیم ساتھ ساتھ چلتے ہیں۔ انہوں نے کہا کہ ترقی اب ٹیکنالوجی سے جڑی ہوئی ہے اور پنجاب کے نوجوانوں کو جدید دنیا کے تقاضوں کو پورا کرنے کے لیے درکار ہنر اور مہارتوں سے آراستہ کیا جانا چاہیے۔

وزیراعلیٰ نے طلبا کے لیے جدید دُنیا کے تقاضوں سے ہم آہنگ ہونے کے مواقع پیدا کرنے کے لیے حکومت کی کوششوں پر روشنی ڈالی اور کہا کہ ان کوششوں کے ایک حصے کے طور پر، پنجاب میں طلبا کو مصنوعی ذہانت (اے آئی)، سافٹ ویئر ڈویلپمنٹ اور فری لانسنگ سمیت بین الاقوامی معیار کے آئی ٹی کورسز تک رسائی فراہم کی جائے گی۔

مریم نواز نے نشاندہی کی کہ ان اقدامات سے نوجوانوں کو آئی ٹی کورسز میں سرٹیفکیشن حاصل کرنے میں مدد ملے گی جو عالمی سطح پر جاب حاصل کرنے کی ضروریات کو پورا کرتے ہیں۔ وزیراعلیٰ نے لاہور میں پاکستان کا پہلا ’نواز شریف آئی ٹی سٹی‘ بنانے کا بھی اعلان کیا۔ شہر میں جدید ترین سہولیات فراہم کی جائیں گی اور جڑواں ٹاورز کی تکمیل رواں سال کے آخر میں متوقع ہے۔

آئی ٹی سٹی میں ایک پلگ اینڈ پلے کال سینٹر مرکز بھی ہوگا، جو آئی ٹی کے شعبے میں تعلیمی مواقع اور روزگار دونوں پیش کرے گا۔

قابل ذکر ہے کہ بین الاقوامی آئی ٹی یونیورسٹیوں نے آئی ٹی سٹی میں کیمپس قائم کرنے میں دلچسپی کا اظہار کیا ہے ، جس سے خطے کے ڈیجیٹل تعلیم کے بنیادی ڈھانچے کو مزید تقویت ملے گی۔

مریم نواز نے کہا کہ ڈیجیٹلائزیشن کی جاری کوششوں سے نوجوانوں کو بااختیار بنایا جائے گا، انہیں خودمختاری، ترقی اور عالمی معیشت میں حصہ ڈالنے میں کامیابی ملے گی۔ اس اقدام کا مقصد پنجاب کو جدت طرازی اور آئی ٹی پر مبنی معاشی ترقی کا مرکز بنانا ہے۔