عمران خان کے کہنے پر آرمی چیف سے ان کے استاد کے ذریعے ملاقات کی کوشش کی، اعظم سواتی

پاکستان تحریک انصاف (پی ٹی آئی) کے سینیئر رہنما اعظم سواتی نے انکشاف کیا ہے کہ انہوں نے بانی پی ٹی آئی عمران خان کے کہنے پر آرمی چیف جنرل سید عاصم منیر سے ان کے استاد، قریبی دوست اور سابق صدر عارف علویؔ کے ذریعے ملاقات کی کوشش کی۔

اتوار کو آزاد ڈیجیٹل کو موصول ہونے والے ویڈیوپیغام میں سابق وفاقی وزیراور پی ٹی آئی کے سینیئر رہنما اعظم سواتی نے کہا کہ پی ٹی آئی کے رہنما ڈاکٹر بابر اعوان نے میرے بیٹے کو بانی پی ٹی آئی سے ملوایا، بانی پی ٹی آئی نے 10 منٹ تک میری صحت سے متعلق پوچھا، اس وقت راولپنڈی انسٹیٹیوٹ آف کارڈیالوجی میں میرا علاج ہو رہا تھا۔

اعظم سواتی نے کہا کہ عمران خان کی جیب میں کھوٹے سکے ہیں، مانسہرہ میں ان کے ایک سو ووٹ بھی نہیں ہیں، مجھے یہاں جب اسٹبلشمنٹ نے الیکشن نہ لڑنے دیا تو گستاسب خان کو یہاں سے الیکشن لڑایا گیا، گستاسب خان جو پارٹی چھوڑ گیا تھا اسے ٹکٹ ملا تو اس نے نواز شریف کو ہرایا۔

اعظم سواتی نے انکشاف کیا کہ دسمبر 2022 میں نئے جب نئے آرمی چیف کا تقرر ہوا تو بانی پی ٹی آئی عمران خان نے مجھے بلا کر کہا کہ ’میں آرمی چیف سے بات کرنا چاہتا ہوں‘۔ بانی پی ٹی آئی کا کہنا تھا کہ ’ فوجی مجھے گالیاں دیتے ہیں اور میرے ساتھی اس پر ہنستے ہیں‘ بانی پی ٹی آئی نے مجھے کہا کہ ’آپ پر مجھے اعتماد ہے آپ جائیں اور فوجی قیادت سے بات کریں۔

اعظم سواتی نے انکشاف کیا کہ بانی پی ٹی آئی عمران خان سے مشاورت کے بعد عاصم منیر کے استاد کے ذریعے رابطے کی کوشش کی، آرمی چیف سید عاصم منیر کے قریبی دوست سمیت سابق صدر عارف علوی کے ذریعے بھی رابطے کی کوشش کی، لیکن آرمی چیف سے بات چیت کے لیے ان کے دروازے نہ کھل سکے۔

انہوں نے مزید کہا کہ پارٹی رہنماؤں نے مجھے گھر سے اٹھایا اور 22 اگست کے جلسے کو ملتوی کروانے کا کہا، بیرسٹر گوہر میرے گھر آئے اور مجھے اڈیالہ لے کر گئے، بانی پی ٹی آئی سے کہا میں عارف علوی اور ساتھیوں سے ملکر اسٹیبلشمنٹ سے بات کروں گا۔ بانی پی ٹی آئی نے کہا کسی کو بتانے کی ضرورت نہیں کہ کس سے کہاں رابطہ کر رہے ہو، کسی نے آپ سے نہیں پوچھنا۔

اعظم سواتی نے بتایا کہا کہ بانی پی ٹی آئی نے کہا کہ اگر وہ بات کرنا چاہتے ہیں تو میں پہلے دن سے تیار ہوں،  ایک کوئی کہتا ہے کہ اعظم سواتی 26 نومبر کو کہاں تھا تو میں اس دن اٹک جیل میں تھا ، کون ہے جو اتنی قربانی کے بعد کہے کہ بانی کا مشن چھوڑ دو، مجھ پر تشدد ہوا میں پارٹی میں تفریق نہیں پیدا کرنا چاہتا۔