قومی انٹر نیشنل ایئر لائن نے لاہور سے آذربائیجان کے دارالحکومت باکو کے لیے براہ راست ہفتہ وار 2 پروازیں شروع کرنے کی خوشخبری سنا دی۔
پی آئی اے 20 اپریل سے لاہور سے باکو کیلیے اتوار اور بدھ کو دو پروازیں آپریٹ کرے گی۔ اس سلسلے میں ٹریول ایجنٹس اور ٹور آپریٹرز کے اعزاز میں خصوصی تقریب منعقد کی گئی جہاں انہیں پروازوں سے متعلق معلومات دی گئیں۔
باکو میں فلائٹس کے آغاز سے دونوں ملکوں کے درمیان دو طرفہ سیاحت اور تجارتی روابط کو فروغ ملے گا۔ اس سے قبل اپریل 2024 میں باکو سے کراچی کے لئے پروازوں کا آغاز کیا گیا تھا۔
پہلی پرواز کے کراچی ائیرپورٹ پہنچنے پر طیارے کو سول ایوی ایشن اتھارٹی کی طرف سے واٹر سلوٹ کی سلامی دی گئی تھی۔ اُس وقت گورنر سندھ اورآذربائیجان کے سفیر نے کراچی سے باکو جانے والے مسافروں کو الوداع کیا۔
اس موقع پر گورنر سندھ کامران خان ٹیسوری کا کہنا تھا کہ باکو کیلیے پروازیں شروع کرنے سے سیاحت اور تجارت کو دوطرفہ فروغ حاصل ہوگا۔ آذربائیجان کے سفیر کا کہنا تھا کہ آج کراچی سے باکو کیلیے آذربائیجان کی پہلی پرواز روانہ ہو گی ۔
ان کا کہنا تھا کہ گزشتہ برس وفاقی دارالحکومت اسلام آباد اور لاہور کے لیے پروازوں کا آغاز کیا تھا، لاہور اور اسلام آباد کے بعد کراچی کی پروازوں میں بھی کامیابی دیکھیں گے۔
By 
