معاشی میدان میں بھی’’ آپریشن بنیان مرصوص‘‘طرز کی کامیابی حاصل کریں گے، احسن اقبال

وفاقی وزیر منصوبہ بندی و ترقی احسن اقبال نے کہا ہے کہ ملک کو سکیورٹی کی طرح معیشت کے شعبے میں بھی مربوط حکمت عملی کے تحت کامیابی کی ضرورت ہے۔ انہوں نے کہا کہ آپریشن بنیان مرصوص میں نمایاں کامیابی ملی ہے اور اب اسی عزم و جذبے سے معیشت کو بھی سنوارا جائے گا۔

نارووال میں میڈیا سے گفتگو کرتے ہوئے احسن اقبال نے کہا کہ پاکستان کا شمار دنیا کے ان ممالک میں ہوتا ہے جہاں ٹیکس ادائیگی کی شرح نہایت کم ہے۔ ہم بڑے خواب دیکھتے ہیں مگر ان کی تعبیر کے لیے ہمیں ٹیکس نظام کو بہتر بنانا ہوگا۔

یہ بھی پڑھیں:بزدل بھارت رافیل طیاروں کی ناکامی کے بعد اپنی خفت مٹانے کےلیے اب ڈرون بھیج رہا ہے، احسن اقبال

ان کا کہنا تھا کہ ٹیکس ٹو جی ڈی پی تناسب کو موجودہ 10.5 فیصد سے بڑھا کر 16 سے 18 فیصد تک لے جانا ناگزیر ہے۔ انہوں نے زور دیا کہ ہر شہری کو اپنی آمدنی پر دیانتداری سے ٹیکس دینا چاہیے، اور جو لوگ پہلے سے ٹیکس ادا کر رہے ہیں وہ ٹیکس چوری روکنے میں نگران کا کردار ادا کریں۔

یہ بھی پڑھیں:پانی کے مسئلے پر ہمیں سیاست نہیں کرنی چاہیے، احسن اقبال

وفاقی وزیر نے کہا کہ اگر ہم پائیدار ترقی چاہتے ہیں تو ہمیں برآمدات میں معمولی اضافے کے بجائے ہر سال 5 سے 10 ارب ڈالر کی سطح تک چھلانگ لگانی ہوگی۔ احسن اقبال نے یہ بھی بتایا کہ حکومت آئندہ بجٹ میں پاکستان کو ٹیکنالوجی پر مبنی جدید معیشت بنانے کے لیے اہم اقدامات تجویز کرے گی۔

یہ بھی پڑھیں:پاکستان پیپلز پارٹی کے سینئر رہنما رضا ہارون کا شہباز گل کو کرارا جواب

ان کا کہنا تھا کہ پاکستان کے سائنسدانوں اور ا نجینئرز نے دفاعی شعبے میں نمایاں کامیابیاں حاصل کی ہیں ،28مئی کو ایٹمی دھماکوں نے ملک کو ایٹمی طاقت بنایا، جبکہ 10 مئی کو افواجِ پاکستان نے بھارت کو منہ توڑ جواب دے کر اس کا غرور خاک میں ملا دیا۔