اسلام آباد میں ڈرون کے ذریعے ٹریفک خلاف ورزیوں پر چالان شروع

ویب ڈیسک۔ اسلام آباد ٹریفک پولیس نے ڈرون پر مبنی نگرانی کے نظام کے آغاز کے بعد پہلے سات دنوں میں 150 سے زائد چالان جاری کیے۔

چیف ٹریفک آفیسر (CTO) کیپٹن (ر) ذیشان حیدر نے بتایا کہ پاکستان میں پہلی بار ڈرون ٹیکنالوجی کے ذریعے ٹریفک چالان جاری کیے گئے ہیں۔ ایک ہفتے کے دوران مجموعی طور پر 208 خلاف ورزیاں ریکارڈ کی گئیں، جن میں سے 163 پر چالان اور 45 پر وارننگ لیٹر جاری کیے گئے۔

انہوں نے کہا کہ ڈرون نگرانی کا نظام نگرانی کے لیے مؤثر ثابت ہوا ہے، جس کی مدد سے لین کی خلاف ورزی، ریڈ لائٹ توڑنے اور دیگر ٹریفک قوانین کی خلاف ورزیوں کا قریب سے مشاہدہ ممکن ہوا ہے۔

سی ٹی او نے مزید بتایا کہ اس نظام کو اسلام آباد بھر میں وسعت دی جائے گی۔ ان کا کہنا تھا کہ وفاقی دارالحکومت میں ٹریفک قوانین کی خلاف ورزی کسی صورت برداشت نہیں کی جائے گی۔

یہ بھی پڑھیں: بھارت کا سوشل میڈیا پر بلوچستان میں پولیس افسران کے اجتماعی استعفوں کا بے بنیاد پروپیگنڈا