نیب راولپنڈی نے بی فار یو کیس کے متاثرین کو ادائیگیاں شروع کر دیں

نیب راولپنڈی نے بی فار یو فراڈ کیس میں سب سے بڑی تعداد یعنی 17 ہزار 500 متاثرین کو ادائیگیاں شروع کر دی ہیں اور متاثرین کو چیکس فراہم کیے گئے ہیں۔

نیب کے اعلامیہ کے مطابق، فراڈ متاثرین میں وصول شدہ رقوم کے چیک تقسیم کرنے کے لیے تقریب منعقد کی گئی جس میں چیئرمین نیب نے بھی شرکت کی۔ اعلامیہ میں بتایا گیا کہ اس اسکیم کے تحت عوام سے 7 فیصد ماہانہ منافع کے وعدے پر اربوں روپے اکٹھے کیے گئے تھے۔

نیب راولپنڈی کا کہنا ہے کہ ایک ملزم کے 56 بینک اکاؤنٹس، جائیدادیں اور دیگر اثاثے منجمد کیے گئے ہیں جبکہ قانونی کارروائیوں کے نتیجے میں 7.3 ارب روپے کی ریکوری کا عمل شروع کیا گیا۔

یہ بھی پڑھیں: نیب نے ہاؤسنگ اور پراپرٹی سیکٹر میں فراڈ کی روک تھام کے لیے ڈیجیٹل نظام تیار کرلیا

ابتدائی مرحلے میں 3.7 ارب روپے کی رقم 17 ہزار 500 متاثرین میں تقسیم کی جا رہی ہے، جبکہ باقی 60 فیصد رقم ملزمان کی جائیدادوں کی نیلامی کے بعد چھ ماہ کے اندر ادا کی جائے گی۔

نیب نے مزید بتایا کہ 10 ہزار متاثرین کو مکمل رقم ادا کی جا چکی ہے، جبکہ ساڑھے 7 ہزار متاثرین کو رقم کا 40 فیصد دیا جا رہا ہے۔