پنجاب میں حالیہ سیلاب کے نتیجے میں ہلاکتوں کی تعداد بڑھ کر 97 ہو گئی، جبکہ متاثرہ افراد کی مجموعی تعداد 45 لاکھ 98 ہزار تک جا پہنچی ہے۔
پی ڈی ایم اے پنجاب نے دریائے راوی، ستلج اور چناب میں آنے والے سیلاب سے متعلق تفصیلی رپورٹ جاری کی ہے۔
ریلیف کمشنر پنجاب نبیل جاوید کے مطابق شدید سیلابی صورتحال کے باعث صوبے کے 4500 سے زائد موضع جات متاثر ہوئے ہیں، اعداد و شمار کے مطابق دریائے چناب میں 2335، دریائے ستلج میں 672 اور دریائے راوی میں 1482 موضع جات سیلاب کی زد میں آئے۔
رپورٹ میں بتایا گیا کہ 24 لاکھ 51 ہزار سے زائد افراد کو بروقت ریسکیو آپریشن کے ذریعے محفوظ مقامات تک منتقل کیا گیا، متاثرہ علاقوں میں 396 ریلیف کیمپس اور 490 میڈیکل کیمپس قائم کیے گئے ہیں تاکہ متاثرین کو بنیادی سہولیات فراہم کی جا سکیں۔
مویشیوں کے علاج اور دیکھ بھال کے لیے 405 و ٹرنری کیمپس قائم کیے گئے ہیں جبکہ 19 لاکھ سے زائد جانوروں کو بھی محفوظ مقامات پر پہنچایا گیا ہے۔
مزید برآں منگلا ڈیم میں پانی کی سطح 93 فیصد تک پہنچ گئی ہے جبکہ تربیلا ڈیم اپنی مکمل گنجائش تک بھر چکا ہے، بھارت میں دریائے ستلج پر قائم بھاکڑا ڈیم 88 فیصد، پونگ ڈیم 94 فیصد اور تھین ڈیم 89 فیصد بھر چکے ہیں۔
حکومت پنجاب نے یقین دہانی کروائی ہے کہ متاثرین کے جانی اور مالی نقصانات کا ازالہ کیا جائے گا اور امدادی سرگرمیوں کو مزید تیز کیا جائے گا۔
By 
