محکمہ موسمیات نے اسلام آباد سمیت ملک کے کئی علاقوں میں گرج چمک، تیز ہواؤں اور ژالہ باری کے ساتھ بارش کی پیشگوئی کی ہے۔
محکمہ کے مطابق آج خیبرپختونخوا، اسلام آباد، خطہ پوٹھوہار، شمال مشرقی پنجاب، کشمیر اور گلگت بلتستان میں آندھی، جھکڑ اور گرج چمک کے ساتھ بارش کا امکان ہے۔
بعض مقامات پر موسلا دھار بارش اور ژالہ باری بھی ہو سکتی ہے، خاص طور پر بالائی خیبرپختونخوا، پوٹھوہار، کشمیر اور ملحقہ پہاڑی علاقوں میں۔
اسلام آباد اور گردونواح میں بھی گرج چمک اور تیز ہواؤں کے ساتھ بارش کا امکان ہے، جبکہ بعض مقامات پر ژالہ باری بھی متوقع ہے۔
مری، گلیات، جہلم، اٹک اور چکوال میں بھی بارش کی پیشگوئی کی گئی ہے۔
پنجاب کے دیگر علاقوں جیسے لاہور، سیالکوٹ، خوشاب، سرگودھا، نارووال، حافظ آباد، فیصل آباد، منڈی بہاؤالدین، گجرات، قصور اور گوجرانوالہ میں بھی گرج چمک کے ساتھ بارش متوقع ہے۔
بلوچستان کے جنوبی حصوں میں مطلع جزوی طور پر ابر آلود رہے گا، جبکہ سندھ کے ساحلی علاقوں میں چند مقامات پر ہلکی بارش ہو سکتی ہے۔
خیبرپختونخوا کے بالائی اور وسطی اضلاع بشمول دیر، چترال، سوات، کوہستان، شانگلہ، بٹگرام، مانسہرہ، ایبٹ آباد، ہری پور، بونیر، مالاکنڈ، باجوڑ، مہمند، چارسدہ، نوشہرہ، مردان، صوابی، خیبر، اورکزئی، کرم، پشاور، کوہاٹ، ہنگو، کرک اور وزیرستان میں بھی گرج چمک اور بارش کی توقع ہے۔
آزاد کشمیر اور گلگت بلتستان میں تیز ہواؤں کے ساتھ بارش اور ژالہ باری کا امکان ظاہر کیا گیا ہے۔
محکمہ موسمیات کے مطابق گزشتہ 24 گھنٹوں کے دوران ملک کے بیشتر علاقوں میں موسم گرم اور خشک رہا۔ تاہم، بالائی خیبرپختونخوا کے چند مقامات پر بارش ہوئی جبکہ کراچی میں ہلکی بوندا باندی ریکارڈ کی گئی۔
By 
