صوبہ پنجاب نے صحت کے شعبے میں ایک تاریخی سنگِ میل عبور کرتے ہوئے میو اسپتال لاہور میں پہلا جدید کوبلیشن کینسر ٹریٹمنٹ سینٹر قائم کر دیا ہے۔ وزیر اعلیٰ مریم نواز جمعرات کو اس جدید سہولت کا باضابطہ افتتاح کریں گی، جو کہ صوبے میں کینسر کے علاج کے ایک نئے دور کا آغاز ہے۔
یہ جدید مرکز چین سے درآمد شدہ کوبلیشن ٹیکنالوجی کا استعمال کرتا ہے، جو کہ روایتی سرجری اور کیموتھراپی کے مقابلے میں ایک محفوظ، مؤثر اور غیر جراحی متبادل فراہم کرتی ہے۔ اس طریقہ علاج میں بجلی کی حرارت کے ذریعے کینسر زدہ ٹشوز کو جلایا جاتا ہے، جس سے مریض کو کم تکلیف ہوتی ہے اور صحت یابی کا عمل تیز ہو جاتا ہے۔
کامیاب تجرباتی علاج
میو اسپتال کے ڈاکٹروں نے اس ٹیکنالوجی کو کامیابی سے آزما لیا ہے۔ 2 پیچیدہ کیسز میں ایک مریض جس کے جگر کو خون سپلائی کرنے والی شریانوں میں رسولی تھی اور دوسرا مریض بریسٹ کینسر کا شکار تھا، دونوں کا علاج کوبلیشن سے کیا گیا، اور مثبت نتائج سامنے آئے۔
جدید مشینری اور عملے کی تربیت مکمل
وزیراعلیٰ مریم نواز کی ہدایت پر جدید مشینری چین سے منگوائی گئی، جو میو اسپتال میں نصب کر دی گئی ہے۔ اسپتال کے ڈاکٹروں اور اسٹاف کو جدید طریقہ علاج کی مکمل تربیت دی جا چکی ہے تاکہ علاج محفوظ اور مؤثر انداز میں کیا جا سکے۔
کوبلیشن، جسے ’کنٹرولڈ ایبلیشن‘ بھی کہا جاتا ہے، ایک جدید طریقہ علاج ہے جس میں ریڈیو فریکوئنسی انرجی کے ذریعے حرارت پیدا کر کے کینسر زدہ ٹشوز کو ختم کیا جاتا ہے۔ یہ طریقہ نہ صرف محفوظ اور کم تکلیف دہ ہے بلکہ روایتی علاج کے مقابلے میں جلد صحت یابی کو بھی ممکن بناتا ہے۔
ڈاکٹروں کی جانب سے خوش آئند قدم قرار
ماہرین صحت نے کوبلیشن سینٹر کے قیام کو پنجاب میں کینسر کے علاج کے لیے ایک انقلابی قدم قرار دیا ہے۔ یہ ٹیکنالوجی خاص طور پر پھیپھڑوں، بریسٹ، اور جگر کے کینسر کے مریضوں کے لیے فائدہ مند ثابت ہو سکتی ہے۔
میو اسپتال کے ایک سینئر آنکولوجسٹ کا کہنا تھا:
“یہ پنجاب میں کینسر کے علاج کے لیے ایک بڑی تبدیلی ہے۔ کوبلیشن مریضوں کو بہتر نتائج، کم تکلیف اور جلد صحت یابی کی سہولت فراہم کرے گا۔”
کوبلیشن سینٹر کا آغاز پنجاب حکومت کے صحت کے شعبے میں جدید ٹیکنالوجی کے فروغ اور عوام کو عالمی معیار کی سہولیات فراہم کرنے کے عزم کی عکاسی کرتا ہے۔
By 
