امریکی صدر سے وزیراعظم اور فیلڈ مارشل کی ملاقات، سیکورٹی و انٹیلی جنس تعاون بڑھانے پر زور،اعلامیہ

وزیراعظم پاکستان محمد شہباز شریف اور امریکی صدر ڈونلڈ ٹرمپ کے درمیان ملاقات کا تفصیلی اعلامیہ جاری کر دیا گیا ہے، وزیراعظم کے ہمراہ فیلڈ مارشل عاصم منیر بھی اس اعلیٰ سطحی ملاقات میں شریک تھے۔

وزیراعظم آفس کی جانب سے جاری بیان کے مطابق ملاقات خوشگوار ماحول میں ہوئی، اس موقع پر وزیراعظم شہباز شریف نے امریکی صدر کو امن کا علمبردار قرار دیا اور کہا کہ دنیا میں تنازعات کے خاتمے کے لیے صدر ٹرمپ کی کاوشیں قابلِ تحسین ہیں۔

ملاقات کے دوران انسداد دہشت گردی میں تعاون، علاقائی اور عالمی سلامتی کی صورتحال پر تفصیلی تبادلہ خیال کیا گیا، وزیراعظم نے پاکستان کے کردار کی امریکی حکومت اور عوام کی جانب سے توثیق پر صدر ٹرمپ کا شکریہ ادا کرتے ہوئے سکیورٹی اور انٹیلی جنس تعاون کو مزید وسعت دینے پر زور دیا۔

وزیراعظم نے اس بات کو سراہا کہ امریکی صدر نے پاکستان اور بھارت کے درمیان کشیدگی کم کرنے اور جنگ بندی کے قیام میں اہم کردار ادا کیا جس سے خطے میں بڑے تصادم سے بچاؤ ممکن ہوا،شہباز شریف نے صدر ٹرمپ کی قیادت کو جرأت مندانہ قرار دیا۔

مشرق وسطیٰ کی صورتحال پر گفتگو کرتے ہوئے وزیراعظم نے غزہ میں جنگ کے فوری خاتمے کے لیے امریکی صدر کی کوششوں اور نیویارک میں مسلم رہنماؤں کو امن مذاکرات کے لیے مدعو کرنے کے اقدام کو قابلِ تعریف قرار دیا۔

Prime Minister and Field Marshal’s meeting with U.S. President Donald J. Trump at the Oval Office, White House

Prime Minister Muhammad Shehbaz Sharif called on President Donald J. Trump, at the White House this afternoon. He was accompanied by Field Marshal Syed Asim Munir NI… pic.twitter.com/jPN0TppDJs

— PTV News (@PTVNewsOfficial) September 26, 2025

مزید برآں وزیراعظم نے اس سال کے آغاز میں پاکستان اور امریکہ کے درمیان طے پانے والے ٹیرف معاہدوں پر بھی شکریہ ادا کیا اور توقع ظاہر کی کہ دونوں ممالک کی دیرینہ شراکت داری صدر ٹرمپ کی قیادت میں مزید مضبوط ہو گی، اس موقع پر انہوں نے امریکی سرمایہ کاروں کو پاکستان کے زرعی، معدنیات، آئی ٹی اور توانائی کے شعبوں میں سرمایہ کاری کی دعوت دی۔

وزیراعظم شہباز شریف نے صدر ٹرمپ کو پاکستان کے سرکاری دورے کی باضابطہ دعوت بھی دی، جسے امریکی صدر نے خوش دلی سے قبول کیا، اوول آفس میں ہونے والی یہ ملاقات تقریباً پچپن منٹ تک جاری رہی، جس میں امریکی نائب صدر جے ڈی وینس اور وزیر خارجہ مارکو روبیو بھی شریک تھے۔