صوبائی وزیر صنعت چوہدری شافع کی زیر صدارت پیسک بورڈ کا اجلاس منعقد ہوا، جس میں ایم ڈی پیسک سائرہ عمر نے آٹھ نکاتی ایجنڈے پر تفصیلی بریفنگ دی۔
اجلاس میں ملازمین کے لیے بنیادی تنخواہ میں 100 فیصد اسپیشل الاؤنس دینے کا فیصلہ کیا گیا، جس کے بعد پرانے ڈسپیریٹی، مہنگائی اور دیگر الاؤنسز بند ہو جائیں گے۔
اجلاس میں کینسل پلاٹس سے متعلق ایک خصوصی کمیٹی تشکیل دی گئی جو دو ہفتوں میں اپنی سفارشات پیش کرے گی۔ اسی طرح اسٹیٹس 2 اور 3 سمڑیال میں منسوخ کیے گئے پلاٹوں کے لیٹرز واپس لینے کا بھی فیصلہ کیا گیا۔
بورڈ نے پیسک اسٹیٹ ڈیولپمنٹ اینڈ مینجمنٹ رولز 2025 کی منظوری دی، جبکہ اسمال انڈسٹریل اسٹیٹ 4 گوجرانوالہ میں بجلی فراہمی کے منصوبے کی منظوری بھی دے دی گئی۔
مزید برآں، اجلاس میں پیسک میڈیکل پالیسی 2023، انٹرن شپ پروگرام اور فنانشل پاورز کے نظریاتی شیڈول میں ترامیم کو بھی منظور کیا گیا۔
پیسک اور اخوت کے درمیان خود روزگار اسکیم کی حکمت عملی کی منظوری دی گئی، جبکہ اسمال انڈسٹریل اسٹیٹس میں انفرااسٹرکچر کی بہتری کے پروگرام کا آغاز کیا جائے گا۔ اس پروگرام کے تحت صفائی، سیکیورٹی اور سڑکوں کی حالت کو بہتر بنایا جائے گا۔
By 
