ایشیا کپ ٹرافی تنازع پر بھارت کو ’آسانی سے نکلنے نہیں دیں گے‘، پی سی بی چیئرمین محسن نقوی کا دبنگ اعلان

پاکستان کرکٹ بورڈ (پی سی بی) کے چیئرمین محسن نقوی نے کہا ہے کہ پاکستان ایشیا کپ ٹرافی تنازع پر خاموش تماشائی نہیں بنے گا اور آئندہ آئی سی سی اجلاس میں بھارت کے مؤقف کا بھرپور جواب دے گا۔

دبئی میں 4 سے 7 نومبر تک ہونے والے اعلیٰ سطح کے اجلاس میں توقع کی جا رہی ہے کہ بورڈ آف کنٹرول فار کرکٹ ان انڈیا (بی سی سی آئی) ایشیا کپ ٹرافی کے معاملے کو باقاعدہ طور پر اٹھائے گا، جو حالیہ دنوں میں دونوں ملکوں کے درمیان ایک سفارتی تنازع کی شکل اختیار کر چکا ہے۔

یہ بھی پڑھیں:’بھارت ہے، نرمی برتو‘، سابق میچ ریفری کرس براڈ کے ’آئی سی سی ‘ کی بھارت نوازی سے متعلق چونکا دینے والے انکشافات

لاہور میں صحافیوں سے غیر رسمی گفتگو کرتے ہوئے محسن نقوی نے واضح کیا کہ پاکستان اجلاس میں بھرپور شرکت کرے گا اور اپنے مؤقف کو واضح انداز میں پیش کرے گا۔ ان کے یہ بیانات اس وقت سامنے آئے ہیں جب بعض غیر ملکی میڈیا رپورٹس میں پاکستان کے ممکنہ بائیکاٹ یا نرم رویے کی قیاس آرائیاں کی جا رہی تھیں۔

محسن نقوی نے کہا، ’پی سی بی کسی کو بھی یکطرفہ غلبہ حاصل نہیں کرنے دے گا۔ ہم اجلاس میں موجود ہوں گے، بات کریں گے اور پاکستان کا مؤقف پوری وضاحت کے ساتھ پیش کریں گے۔‘

انہوں نے زور دے کر کہا کہ پاکستان بھارت کو ایشیا کپ ٹرافی کے معاملے پر ’آسانی سے نکلنے‘ نہیں دے گا۔

تنازع کی جڑ ایشیا کپ فائنل کے بعد اس وقت پڑی جب بھارتی کرکٹ ٹیم نے مبینہ طور پر محسن نقوی سے ٹرافی وصول کرنے سے انکار کر دیا۔ اس واقعے نے سوشل میڈیا پر شدید ردعمل کو جنم دیا، جہاں اسے کھیل کے بجائے سیاسی مخاصمت کا مظہر قرار دیا گیا۔

ابتدائی طور پر ایک عام پوسٹ میچ واقعہ سمجھا جانے والا یہ معاملہ اب آئی سی سی کے ایگزیکٹو اجلاس کے ایجنڈے میں شامل ہو چکا ہے، جس سے ظاہر ہوتا ہے کہ بھارت اور پاکستان کے درمیان کرکٹ تعلقات کس قدر سیاسی رنگ اختیار کر چکے ہیں۔

مزید پڑھیں:بھارتی ٹیم کو ایشیا کپ کی ٹرافی وصول کرنے کے لیے کہاں آنا ہوگا؟ محسن نقوی کا واضح مؤقف

محسن نقوی کے حالیہ بیانات سے ظاہر ہوتا ہے کہ پاکستان بین الاقوامی کرکٹ کے معاملات میں اپنا اثرورسوخ بڑھانے کے لیے پرعزم ہے، خاص طور پر ایسے وقت میں جب سیاسی دباؤ کے باعث آئی سی سی کے فیصلوں کی غیر جانبداری پر سوال اٹھائے جا رہے ہیں۔

محسن نقوی نے کہا، ’ہم کسی کے لیے میدان خالی نہیں چھوڑیں گے۔ پاکستان آئی سی سی اجلاس میں بھرپور کردار ادا کرے گا اور ہر معاملے پر اعتماد اور وضاحت کے ساتھ اپنا مؤقف پیش کرے گا۔‘

دبئی میں ہونے والا یہ اجلاس اب جنوبی ایشیا کی دو بڑی کرکٹ طاقتوں کے درمیان ایک اور ’آف دی فیلڈ‘ ٹکراؤ کا منظر پیش کرے گا، جہاں مقابلہ بیٹ اور بال سے نہیں بلکہ بیانات اور سفارتی حکمت عملی سے ہوگا۔

ماہرین کا کہنا ہے کہ ایشیا کپ ٹرافی تنازع اب محض ایک کھیل کا معاملہ نہیں رہا، بلکہ یہ جنوبی ایشیا میں کھیل اور سیاست کے تصادم کی علامت بن چکا ہے۔