پاکستان اور سری لنکا کی ون ڈے سیریز ری شیڈول ہونے کا امکان

دورۂ پاکستان پر موجود سری لنکن کرکٹ ٹیم کے کھلاڑیوں نے دورہ ادھورا چھوڑ کر واپس جانے کی خواہش کا اظہار کیا ہے۔ سری لنکن کرکٹ ٹیم کے مینجر نے تصدیق کی ہے کہ کھلاڑی وطن واپس جانا چاہتے ہیں۔

میڈیا رپورٹس کے مطابق، اس صورتحال کے پیشِ نظر چیئرمین پاکستان کرکٹ بورڈ (پی سی بی) اور وزیرِ داخلہ کچھ دیر بعد سری لنکن ٹیم سے ملاقات کریں گے۔ ملاقات میں ٹیم کو سکیورٹی انتظامات کے حوالے سے تفصیلی بریفنگ دی جائے گی تاکہ ان کے خدشات دور کیے جا سکیں۔

اطلاعات کے مطابق، سری لنکن ٹیم نے آج شام کا شیڈول پریکٹس سیشن منسوخ کر دیا تھا۔ اس سے قبل پاکستان کرکٹ ٹیم نے بھی آج آرام کا دن رکھنے کا فیصلہ کیا تھا، جس کے بعد سری لنکن ٹیم نے بھی اپنا پریکٹس سیشن ملتوی کر دیا۔

ذرائع کا کہنا ہے کہ سری لنکن کھلاڑیوں کی جانب سے سکیورٹی خدشات کے پیش نظر وطن واپسی کی خواہش کا اظہار کیا گیا ہے۔ پی سی بی حکام اور سکیورٹی ادارے اس معاملے کو حل کرنے کے لیے متحرک ہیں اور ٹیم کو مکمل اطمینان دلانے کی کوشش کر رہے ہیں۔

یہ بھی پڑھیں؛ قومی کرکٹر نسیم شاہ کے گھر پر فائرنگ، پولیس نے تحقیقات شروع کر دیں

واضح رہے کہ سری لنکا کو پاکستان کے خلاف ون ڈے سیریز کے بقیہ دو میچز کھیلنے ہیں، جس کے بعد پاکستان میں سہ ملکی سیریز بھی شیڈول ہے۔ پاکستان اور سری لنکا کے درمیان دوسرا ون ڈے میچ کل راولپنڈی میں ہونا طے ہے۔ تاہم، سری لنکن ٹیم کے ممکنہ فیصلے کے بعد سیریز کے مستقبل کے بارے میں غیر یقینی کی صورتحال پیدا ہو گئی ہے۔