اردن کے بادشاہ شاہ عبداللہ دوم کا گلوبل انڈسٹریز اینڈ ڈیفنس سولیوشنز کا دورہ، پاکستانی دفاعی صلاحیتوں کی تعریف

اردن کے بادشاہ شاہ عبداللہ دوم نے گلوبل انڈسٹریز اینڈ ڈیفنس سولیوشنز (GIDS) ہیڈکوارٹر کا دورہ کیا، جہاں ان کے ہمراہ شہزادی سلمیٰ سمیت اردن کے سول اور عسکری وفد کے ارکان بھی موجود تھے۔

 فیلڈ مارشل عاصم منیر نے شاہ عبداللہ دوم کا پُرتپاک استقبال کیا۔ دورے کے دوران شاہ عبداللہ کو ادارے کی جدید صلاحیتوں اور دفاعی مصنوعات کے بارے میں تفصیلی بریفنگ دی گئی۔

آئی ایس پی آر کے مطابق شاہ عبداللہ دوم کو پاکستان کی دفاعی پیداوار، ٹیکنالوجی میں پیش رفت اور دونوں ممالک کے درمیان موجود باہمی دفاعی تعاون کے نئے مواقع کے حوالے سے بھی آگاہ کیا گیا۔ بعد ازاں شاہ عبداللہ نے ٹلہ فیلڈ فائرنگ رینج کا دورہ کیا، جہاں وزیرِ اعظم شہباز شریف بھی تقریب میں شریک ہوئے۔ اس موقع پر آذربائیجان کے وزیرِ دفاعی صنعت بھی موجود تھے۔

شاہ عبداللہ دوم نے ٹلہ فیلڈ فائرنگ رینج میں مشترکہ فائر پاور اور فوجی مشق کا معائنہ کیا، جس میں زمینی، فضائی اور ملٹی ڈومین آپریشنز کا عملی مظاہرہ پیش کیا گیا۔ مشق کے دوران ڈرونز، اسپیکٹرم وارفیئر اور مربوط فائر پاور کے نمایاں مظاہرے نے شرکاء کو متاثر کیا۔ شاہ عبداللہ دوم نے مشق میں شامل پاکستانی افواج کی پیشہ ورانہ مہارت، اعلیٰ تیاریوں اور مضبوط صلاحیتوں کو سراہا۔

یہ بھی پڑھیں: پنجاب، فلور ملوں کیلئے گندم کی اجرائی قیمت مقرر، صارفین کیلئے آٹے کی قیمت کا تعین بھی ہو گیا

اس موقع پر وزیرِ اعظم شہباز شریف نے شاہ عبداللہ دوم کے لیے پاکستانی عوام کی محبت اور احترام کا اظہار کیا اور توقع ظاہر کی کہ شاہِ اردن کا یہ دورہ پاک اردن دوستی اور باہمی اعتماد کی مزید مضبوطی کا باعث بنے گا۔  فیلڈ مارشل سید عاصم منیر نے بھی اس موقع پر گفتگو کرتے ہوئے کہا کہ پاکستان اور اردن مضبوط دفاعی شراکت دار ہیں، اور انہوں نے دونوں ممالک کے درمیان فوجی تعاون کو مزید گہرا کرنے کے عزم کا اعادہ کیا۔

دورے کے اختتام پر شاہ عبداللہ دوم نے  فیلڈ مارشل عاصم منیر کو “آرڈر آف ملٹری میرٹ فرسٹ ڈگری” کے اعزاز سے نوازا۔ یہ دورہ پاک–اردن برادرانہ تعلقات اور دفاعی تعاون میں ایک اہم سنگِ میل قرار دیا جا رہا ہے۔