محمد رضوان نے ون ڈے کرکٹ میں اہم سنگِ میل عبور کر لیا

پاکستان کرکٹ ٹیم کے وکٹ کیپر بیٹر محمد رضوان نے ایک روزہ کرکٹ میں اہم سنگِ میل عبور کر لیا۔

راولپنڈی میں سری لنکا کے خلاف کھیلا جانے والا تیسرا اور آخری ون ڈے میچ محمد رضوان کے کیریئر کا 100 واں ایک روزہ میچ ثابت ہوا۔ اس موقع پر میدان میں ایک خصوصی تقریب کا انعقاد کیا گیا، جس میں ان کے ساتھی کھلاڑیوں نے اس یادگار لمحے پر انہیں مبارک باد پیش کی ہے۔

میچ کے آغاز سے قبل ہونے والی اس تقریب میں قومی ٹیم کے ہیڈ کوچ مائیک ہیسن نے گفتگو کرتے ہوئے کہا کہ محمد رضوان ہمیشہ میدان میں بھرپور انرجی کے ساتھ اترتے ہیں اور ان میں پاکستان کے لیے کھیلنے کا جذبہ نمایاں طور پر دکھائی دیتا ہے۔ انہوں نے رضوان کی محنت اور کارکردگی کی تعریف کرتے ہوئے کہا کہ یہ سنگِ میل ان کے مستقل عزم اور لگن کا نتیجہ ہے۔

تقریب کے دوران فاسٹ بولر نسیم شاہ نے محمد رضوان کو ان کے 100 ویں ایک روزہ انٹرنیشنل میچ کی یادگاری کیپ پیش کی، جس پر ساتھی کھلاڑیوں نے بھی انہیں مبارک باد دی۔ ٹیم کے ارکان نے اس موقع کو رضوان کے کیریئر کا اہم لمحہ قرار دیا ہے۔

یہ بھی پڑھیں: زمبابوے کرکٹ ٹیم سہ ملکی ٹی20 سیریز میں شرکت کے لیے پاکستان پہنچ گئی، ایئر پورٹ پر شاندار استقبال

راولپنڈی اسٹیڈیم میں منعقد ہونے والا یہ موقع پاکستانی ٹیم کے لیے نہ صرف خوشی کا باعث بنا بلکہ وکٹ کیپر بیٹر کے بین الاقوامی کیریئر میں ایک نئی کامیابی کا باب بھی ثابت ہوا۔ محمد رضوان اس وقت قومی ٹیم کا اہم حصہ ہیں اور ان کی کارکردگی نے انہیں پاکستان کی بیٹنگ لائن اور وکٹ کیپنگ میں نمایاں مقام بخشا ہے۔