پاکستان کے نائب وزیراعظم اور وزیر خارجہ سینیٹر محمد اسحاق ڈار 17 سے 18 نومبر 2025 تک روس کے دارالحکومت ماسکو میں ہونے والے شنگھائی تعاون تنظیم (ایس سی اُو) کے سربراہانِ حکومت کونسل (سی ایچ جی) کے اجلاس میں پاکستان کی نمائندگی کریں گے۔ یہ دورہ روس کے وزیراعظم میخائل ولادیمیرووِچ میشوسٹین کی دعوت پر ہو رہا ہے۔
دفتر خارجہ کی جانب سے جاری بیان کے مطابق اس اجلاس میں ایس سی او رکن ممالک بشمول بیلا روس، چین، قازقستان، کرغزستان، روس، تاجکستان اور ازبکستان کے سربراہانِ حکومت، ایران کے نائب صدر اور پاکستان و بھارت کے وزرائے خارجہ شرکت کریں گے۔
اس کے علاوہ منگولیا، بحرین، مصر، قطر، کویت اور ترکمانستان کے سربراہانِ حکومت بھی مدعو ہیں۔ علاقائی اور بین الاقوامی تنظیموں کے سربراہان، جن میں سی آئی ایس، ای اے ای یو، سی ایس ٹی او اور ڈی ایس اے شامل ہیں، بھی اجلاس میں شریک ہوں گے۔
وزارتِ خارجہ کے مطابق سینیٹر اسحاق ڈار اپنے خطاب میں پاکستان کا نقطۂ نظر اہم علاقائی و عالمی امور پر پیش کریں گے اور ایس سی او خطے کے فائدے کے لیے تنظیم کو مزید مضبوط بنانے سے متعلق تجاویز بھی دیں گے۔
ایس سی او کا سربراہانِ حکومت اجلاس تنظیم کا دوسرا بڑا فیصلہ ساز فورم ہے۔ یہ فورم اقتصادیات، مالیات، تجارت، رابطہ کاری، تجارت و صنعت اور سماجی و معاشی تعاون کے مختلف پہلوؤں پر رہنمائی فراہم کرتا ہے۔ اجلاس میں مشترکہ اعلامیہ، بیانات اور اہم فیصلوں کی منظوری دی جائے گی۔
نائب وزیراعظم اور وزیر خارجہ اسحاق ڈار اجلاس کے دوران مختلف رکن ممالک کے رہنماؤں سے دوطرفہ ملاقاتیں بھی کریں گے، جن کا مقصد باہمی تعاون کو مزید فروغ دینا اور خطے میں پاکستان کے مفادات کو مضبوط کرنا ہے۔
By 
