پاکستان علما کونسل کے سربراہ علامہ طاہر اشرفی نے کہا ہے کہ مدارس کا تعلق تعلیم سے ہے اور انہیں وزارت تعلیم سے منسلک کیا جانا چاہیے۔
انہوں نےکہا کہ 2019 میں مدارس کی رجسٹریشن کے سلسلے میں ایک متفقہ معاہدہ ہوا تھا جس میں تمام پہلوؤں کا جائزہ لیا گیا۔ انہوں نے اس بات پر حیرت کا اظہار کیا کہ مدارس کو وزارت تعلیم کے بجائے وزارت صنعت سے منسلک کرنے کی بات کی جا رہی ہے۔
علامہ اشرفی نے بتایا کہ مدارس کے 15 بورڈز میں سے 10 ایک طرف کھڑے ہیں اور اب تک 18,000 مدارس کی رجسٹریشن ہو چکی ہے۔ انہوں نے کہا کہ ہر روز معاہدے بدلنا اور نظام میں تبدیلیاں کرنا ایک کھیل بن سکتا ہے، اور اس سے مدارس کے مستقبل کو خطرہ ہو سکتا ہے۔
ان کا مزید کہنا تھا کہ مدارس کے ہزاروں طلبا ہیں، اس لیے انہیں وزارت تعلیم سے منسلک کرنا ضروری ہے تاکہ ان کے مستقبل کو محفوظ بنایا جا سکے۔ انہوں نے یہ بھی کہا کہ مدارس کے معاملات کو سیاست کی نذر نہیں ہونے دینا چاہیے۔
By 
