سونے کی اڑان جاری، فی تولہ قیمت میں ایک بار پھر بڑا اضافہ

ملک میں سونے اور چاندی کی قیمتوں میں اضافے کا سلسلہ بدستور جاری ہے اور مقامی صرافہ بازار میں مسلسل ساتویں روز بھی قیمتی دھاتوں کے نرخوں میں نمایاں اضافہ ریکارڈ کیا گیا ہے، جس سے خریداروں اور سرمایہ کاروں میں تشویش پائی جا رہی ہے۔

آل پاکستان صرافہ جیمز اینڈ جیولرز ایسوسی ایشن کے جاری کردہ اعداد و شمار کے مطابق فی تولہ سونا 1300 روپے اضافے کے بعد 5 لاکھ 41 ہزار 262 روپے کی سطح پر پہنچ گیا ہے۔ اسی طرح 10 گرام سونے کی قیمت میں 1114 روپے اضافہ ہوا، جس کے بعد نئی قیمت 4 لاکھ 64 ہزار 44 روپے ہو گئی ہے۔

یہ بھی پڑھیں:رمضان ریلیف پیکج سے رقم حاصل کرنے کے لیے رجسٹریشن کا طریقہ کار تبدیل،نیا طریقہ جانیے

چاندی کے نرخوں میں بھی اضافہ دیکھنے میں آیا ہے۔ مقامی مارکیٹ میں فی تولہ چاندی 268 روپے مہنگی ہو کر 9 ہزار 554 روپے تک پہنچ گئی ہے، جو حالیہ دنوں میں ہونے والے اضافے کا تسلسل ہے۔

دوسری جانب عالمی مارکیٹ میں بھی سونے کی قیمتوں میں اضافہ ریکارڈ کیا گیا ہے، جہاں فی اونس سونا 13 ڈالر مہنگا ہو کر 5185 ڈالر تک پہنچ گیا۔ عالمی سطح پر بڑھتی ہوئی قیمتوں کا اثر مقامی مارکیٹ پر بھی پڑ رہا ہے، جس کے باعث ملک میں سونے کے نرخ بلند ترین سطح کے قریب پہنچ گئے ہیں۔

ماہرین کے مطابق عالمی معاشی غیر یقینی صورتحال، ڈالر کی قدر میں اتار چڑھاؤ اور سرمایہ کاروں کا محفوظ سرمایہ کاری کی جانب رجحان سونے کی قیمتوں میں اضافے کی بڑی وجوہات ہیں۔ صرافہ بازار کے تاجر کہتے ہیں کہ اگر عالمی مارکیٹ میں یہی رجحان برقرار رہا تو آئندہ دنوں میں مزید اضافے کا امکان بھی موجود ہے۔