حکومت نے ملک بھر کے نوجوان طلبہ کے لیے ایک بڑے اوراہم تعلیمی منصوبے کا اعلان کر دیا ہے، جس کے تحت لاکھوں کروم بکس فراہم کیے جائیں گے۔ اس منصوبے کا مقصد نوجوانوں کو جدید ڈیجیٹل سہولیات سے آراستہ کرنا اور آن لائن تعلیم کے فروغ کو یقینی بنانا ہے۔
چیئرمین وزیر اعظم یوتھ پروگرام رانا مشہود احمد خان نے اسلام آباد میں پریس کانفرنس کے دوران نوجوان طلبہ کے لیے اس خوشخبری کا اعلان کیا، انہوں نے کہا کہ حکومت نوجوانوں کو بااختیار بنانے اور انہیں ترقی کے مواقع فراہم کرنے کے لیے عملی اقدامات کر رہی ہے، جو حکومتی پالیسی کی اولین ترجیحات میں شامل ہے۔
رانا مشہود احمد خان نے کہا کہ بیرون ملک مقیم پاکستانی ملک میں سرمایہ کاری میں گہری دلچسپی رکھتے ہیں جس سے نہ صرف ملکی معیشت کو مضبوط بنانے میں مدد ملے گی بلکہ نوجوانوں کے لیے روزگار کے نئے مواقع بھی پیدا ہونگے ان کا کہنا تھا کہ تعلیم اور ٹیکنالوجی میں سرمایہ کاری روشن مستقبل کی ضمانت ہے۔
انہوں نے بتایا کہ ٹی ٹی کیئر فاؤنڈیشن کے تعاون سے نوجوانوں کے لیے مجموعی طور پر 12 لاکھ کروم بکس فراہم کیے جائیں گے۔ ان میں سے 7 لاکھ کروم بکس فوری طور پر طلبہ میں تقسیم کیے جائیں گے، جبکہ باقی 5 لاکھ کروم بکس جون 2026 تک فراہم کر دیے جائیں گے۔
چیئرمین یوتھ پروگرام کے مطابق آئندہ دو برسوں کے دوران ملک بھر کے طلبہ کو مزید 30 لاکھ کروم بکس فراہم کرنے کا بھی منصوبہ تیار کیا گیا ہے۔ ان اقدامات سے آن لائن تعلیم کو فروغ ملے گا اور طلبہ کو جدید تعلیمی وسائل تک بہتر رسائی حاصل ہو سکے گی۔
رانا مشہود احمد خان نے یقین دلایا کہ کروم بکس کی تقسیم کا عمل مکمل شفافیت کے ساتھ انجام دیا جائے گا۔ انہوں نے کہا کہ اس پروگرام میں آزاد کشمیر اور گلگت بلتستان کے طلبہ کو بھی شامل کیا جائے گا تاکہ ملک کے تمام حصوں میں یکساں تعلیمی مواقع فراہم کیے جا سکیں۔
By 
