افغانستان سے پنپنے والی دہشتگردی دنیا بھر کے ممالک کی سلامتی کے لیے ایک سنگین خطرہ بنتی جا رہی ہے، مختلف ممالک میں افغان شہریوں کے دہشت گردانہ سرگرمیوں اور منشیات اسمگلنگ جیسے سنگین جرائم میں ملوث ہونے کے واقعات میں مسلسل اضافہ ہو رہا ہے۔
افغان جریدے ہشت صبح کے مطابق کینیڈا پولیس نے دہشت گردی کے الزامات میں ایک اور افغان شہری کو گرفتار کر لیا ہے، کینیڈین حکام کے مطابق 26 سالہ افغان شہری ولید خان کو ٹورنٹو سے گرفتار کیا گیا، جس پر دہشت گردانہ سرگرمیوں اور کالعدم تنظیم داعش سے مبینہ تعلقات کے الزامات عائد کیے گئے ہیں۔
کینیڈین پولیس کا کہنا ہے کہ ولید خان داعش کو مالی وسائل فراہم کرنے، سوشل میڈیا اکاؤنٹس چلانے اور قتل کے منصوبے بنانے میں بھی ملوث رہا ہے، تحقیقات کے مطابق اس افغان شہری نے نامعلوم افراد کے ساتھ مل کر دہشت گردانہ جرائم انجام دینے کی سازش بھی کی۔
پیل ریجنل پولیس کے ایک سینیئر افسر کے مطابق گرفتاری کے دوران ولید خان کے قبضے سے بھاری اسلحہ اور گولہ بارود بھی برآمد کیا گیا، جس سے ممکنہ بڑے دہشتگرد حملے کا خدشہ ظاہر کیا جا رہا ہے۔
ہشت صبح کے مطابق ولید خان کی گرفتاری سے ایک روز قبل آسٹریا میں بھی ایک افغان پناہ گزین کو منشیات سے متعلق سنگین جرائم کے الزامات میں گرفتار کر کے افغانستان واپس بھیج دیا گیا تھا۔
واضح رہے کہ افغان طالبان رجیم کے زیر انتظام افغانستان میں دہشت گردی، سنگین جرائم اور منشیات کی پیداوار بدستور جاری ہے، طالبان کے سائے تلے سرگرم بے لگام دہشت گرد گروہ پوری دنیا کے لیے ایک بڑے اور پیچیدہ سلامتی چیلنج میں تبدیل ہو چکے ہیں، جس پر عالمی برادری کی تشویش میں مسلسل اضافہ ہو رہا ہے۔
By 
