امریکا کا سو گنا زیادہ طاقتور ٹرمپ کلاس بحری جہاز بنانے کا اعلان

فلوریڈا میں وزیر جنگ اور وزیر بحری امور کے ساتھ اہم پریس کانفرنس کرتے ہوئے ٹرمپ نے کہا کہ ہم نے دنیا کے سب سے بڑے جنگی جہاز بنائے، یہ پرانے آئیوا کلاس جہازوں سے سو گنا زیادہ طاقتور ہیں،  بحریہ کے جہاز المونیم کے بجائے اسٹیل سے بنائے جارہے ہیں۔

امریکی صدر کا کہنا تھا کہ  وکٹری نامی جہاز امریکی فوج کی طاقت کو قائم رکھنے میں مدد دے گا، اس سے امریکی جہاز سازی صنعت کو بحال کرنے میں مدد ملے گی۔

ٹرمپ کا کہنا تھا کہ امریکی بحریہ کو دنیا کی طاقتور ترین بحریہ بنا رہے ہیں، 15 آبدوزیں بنائی جارہی ہیں،  بحریہ کا ہیڈکوارٹر بھی بہتر کیا جارہا ہے۔ چین، روس کوئی بھی آبدوزوں میں ہمارا مقابلہ نہیں ہوسکتا۔

انہوں نے کہا کہ یہ دنیا بھر میں امریکا کے دشمنوں کو خوف زدہ کردیں گے، ایک دو سال پہلے جو ہم پر ہنستے تھے، اب وہ ہمارا احترام کرتے ہیں۔

مزید پڑھیں: امریکا نے وینزویلا کے ساحل کے قریب ایک اورتیل بردار جہاز تحویل میں لے لیا

صدر ٹرمپ نے کہا کہ منشیات کی کشتی تباہ کرنے سے ہم ہر بار25ہزارجانیں بچاتے ہیں، منشیات سے بھری کشتیوں کو سمندر میں تباہ کیا جا رہا ہے، کیریبین میں سمندر کے راستے منشیات کی سمگلنگ96.2 فیصد کم ہوگئی۔

امریکا کے صدر ٹرمپ نے ایک بار پھر فیلڈ مارشل سید عاصم منیر اور وزیر اعظم شہباز شریف کی تعریف کی، اور پاک بھارت جنگ میں طیارے گرائے جانے کا بھی ذکر کیا۔

اس موقع پر امریکی وزیر جنگ پیٹ ہیگسیتھ نے میڈیا سے گفتگو کرتے ہوئے کہا کہ ہم بزور قوت امن قائم کررہے ہیں۔