نوجوانوں کی تعلیمی قابلیت کو بڑھانے کیلئے مؤثر اقدامات حکومت کی اولین ترجیح ہے : وزیراعظم

وزیراعظم محمد شہباز شریف نے کہا ہے کہ نوجوانوں کی قابلیت اور استعداد کار میں اضافے کیلئے مؤثر اقدامات حکومت کی اولین ترجیح ہے۔

تفصیلات کے مطابق وزیراعظم شہباز شریف سے چیئرمین وزیراعظم یوتھ پروگرام رانا مشہود احمد خان نے ملاقات کی جس میں رانا مشہود نے وزیراعظم کو یوتھ پروگرام اور بالخصوص لیپ ٹاپ سکیم سے متعلقہ اُمور پر بریف کیا۔

وزیراعظم شہباز شریف نے یوتھ پروگرام کے تحت نوجوانوں کی فلاح و بہبود کیلئے جاری اقدامات پر اطمینان کا اظہار کیا۔

یہ بھی پڑھیں : مفت لیپ ٹاپ حاصل کرنے کے خواہشمند طلباء کیلئے بڑی خوشخبری

اس موقع پر گفتگو کرتے ہوئے وزیراعظم شہباز شریف کا کہنا تھا کہ نوجوانوں کی تعلیمی قابلیت کو بڑھانے کیلئے موثر اقدامات حکومت کی اولین ترجیح ہے، وفاقی حکومت نوجوانوں کی ہنر مندی اور استعداد کار میں مزید اضافے کیلئے ہر ممکن وسائل بروئے کار لائے گی۔

وزیراعظم محمد شہباز شریف سے چیئرمین وزیراعظم یوتھ پروگرام رانا مشہود احمد خان کی ملاقات

چیئرمین رانا مشہود نے وزیراعظم کو یوتھ پروگرام اور بالخصوص لیپ ٹاپ سکیم سے متعلقہ امور پر بریف کیا

وزیراعظم نے یوتھ پروگرام کے تحت نوجوانوں کی فلاح و بہبود کے لیےجاری اقدامات پر اظہار… pic.twitter.com/MSMeifl5W6

— PTV News (@PTVNewsOfficial) January 27, 2026

یاد رہے کہ کچھ روز قبل وزیراعظم کے مشیر برائے امورِ نوجوانان رانا مشہود احمد خان نے وزیراعظم یوتھ اسکیم کی نمایاں کامیابیوں کو شہباز شریف کے وژن کا عملی ثبوت قرار دیا۔

میڈیا سے گفتگو میں ان کاکہنا تھا کہ وزیراعظم شہباز شریف نوجوانوں کو محض آبادی کا حصہ نہیں بلکہ پاکستان کے مستقبل کے معمار سمجھتے ہیں اور ان کا پختہ یقین ہے کہ باصلاحیت، بااختیار اور بااعتماد نوجوان ہی پاکستان کے بہتر اور مستحکم مستقبل کی ضمانت ہیں۔

انہوں نے کہا کہ وزیراعظم یوتھ اسکلز ڈیولپمنٹ پروگرام کے ذریعے 3 لاکھ نوجوانوں کو فنی اور پیشہ ورانہ تربیت دی گئی، جس سے نوجوانوں کو ملکی اور عالمی لیبر مارکیٹ میں بہتر مواقع میسر آئے۔

رانا مشہود نے یہ بھی کہا کہ نیڈ بیسڈ اسکالرشپس کے ذریعے گریجویٹ طلبہ کو 40 ہزار روپے تک مالی معاونت بھی فراہم کی گئی۔ وزیراعظم شہباز شریف کے وژن کے تحت یہ تمام اقدامات نوجوانوں پر اعتماد کا اظہار ہیں اور یہی نوجوان پاکستان کے روشن، مضبوط اور خودمختار مستقبل کی ضمانت ہیں۔