حطار: انڈسٹریل اسٹیٹ حطار میں گیس کی مین پائپ لائن میں زور دار دھماکے کے بعد خوفناک آگ بھڑک اٹھی، جس نے دیکھتے ہی دیکھتے پورے علاقے کو اپنی لپیٹ میں لے لیا۔
ابتدائی اطلاعات کے مطابق خواتین اور بچوں سمیت 7 افراد جھلس کر جاں بحق ہو چکے ہیں جبکہ متعدد افراد کے زخمی ہونے کی اطلاعات بھی موصول ہو رہی ہیں۔
ریسکیو ذرائع کے مطابق آگ اس قدر شدید ہے کہ اس پر قابو پانا انتہائی مشکل ہو گیا ہے۔ آگ نے فیکٹری کے اندر موجود مزدوروں کے موٹر سائیکلوں، قریبی آبادی کے گھروں اور مال مویشیوں کو بھی اپنی لپیٹ میں لے لیا، جس کے باعث بڑے پیمانے پر مالی نقصان ہوا ہے۔
واقعے کے بعد ضلعی انتظامیہ اور ریسکیو ٹیمیں فوری طور پر موقع پر پہنچ گئیں اور علاقے کو سیل کر دیا گیا ہے۔ مزید جانی نقصان سے بچنے کے لیے قریبی آبادی کو فوری طور پر محفوظ مقامات پر منتقل کیا جا رہا ہے۔
By 
