By پی ایس ایل کے کھیلے گئے میچ میں اسلام آباد یونائیٹڈ نے نیشنل اسٹیڈیم میں عمدہ کارکردگی کا مظاہرہ کرتے ہوئے کراچی کنگز کو آٹھ وکٹوں سے واضح شکست دے دی۔ اس کامیابی کے ساتھ اسلام آباد یونائیٹڈ نے نہ صرف اپنی برتری مزید مستحکم کی بلکہ کراچی کنگز کے خلاف مسلسل دسویں فتح کا اعزاز بھی اپنے نام کر لیا۔
کراچی کنگز نے پہلے بیٹنگ کرتے ہوئے مقررہ اوورز میں چھ وکٹوں کے نقصان پر ایک سو پچاس رنز بنائے۔ ٹیم کی جانب سے ریزا ہینڈرکس نے ذمہ دارانہ بیٹنگ کرتے ہوئے ناقابل شکست اکاون رنز اسکور کیے جبکہ جیسن رائے نے انتالیس اور اعظم خان نے چونتیس رنز بنا کر کچھ مزاحمت دکھائی۔ تاہم دیگر بلے باز نمایاں کارکردگی دکھانے میں ناکام رہے، جس کے باعث ٹیم بڑا مجموعہ ترتیب نہ دے سکی۔
یہ بھی پڑھیں :پی ایس ایل 11 ، زلمی کی چھٹی فتح، کوئٹہ گلیڈی ایٹرز کی مشکلات بڑھ گئیں
اسلام آباد یونائیٹڈ کی جانب سے کپتان شاداب خان نے شاندار باؤلنگ کرتے ہوئے دو کھلاڑیوں کو اٹھائیس رنز کے عوض آؤٹ کیا، جبکہ رچرڈ گلیسن نے بھی دو وکٹیں لے کر حریف ٹیم کو دباؤ میں رکھا۔ہدف کے تعاقب میں اسلام آباد یونائیٹڈ کے اوپنرز نے پراعتماد اور جارحانہ آغاز فراہم کیا۔ سمیع منہاس نے بہترین بیٹنگ کا مظاہرہ کرتے ہوئے چھتیس گیندوں پر اٹھاون رنز بنائے، جن میں دس شاندار چوکے شامل تھے۔ انہوں نے صرف انتیس گیندوں پر اپنی نصف سنچری مکمل کر کے ٹیم کو مضبوط پوزیشن میں پہنچایا۔
دوسری جانب ڈیون کونوے نے بھی ذمہ داری کا مظاہرہ کرتے ہوئے چھتیس گیندوں پر ناقابل شکست ترپن رنز بنائے اور اننگز کو بہترین انداز میں آگے بڑھایا۔ دونوں کھلاڑیوں کی شراکت نے فتح کی بنیاد رکھی۔اسلام آباد یونائیٹڈ نے مطلوبہ ہدف سولہویں اوور میں صرف دو وکٹوں کے نقصان پر ایک سو ترپن رنز بنا کر ہدف حاصل کر لیا اور چوبیس گیندیں پہلے ہی میچ اپنے نام کر لیا۔اس شاندار کامیابی کے بعد اسلام آباد یونائیٹڈ پوائنٹس جدول پر دوسری پوزیشن پر آ گئی ہے اور ابتدائی مرحلے کے اہم مقابلے کے لیے اپنی جگہ مزید مستحکم کر لی ہے۔ ماہرین کے مطابق ٹیم کی متوازن کارکردگی اسے ٹورنامنٹ کے مضبوط دعویداروں میں شامل کر رہی ہے۔
