مولانا شیخ ادریس کی شہادت کے بعد مولانا فضل الرحمان کا بڑا اعلان

جے یو آئی (ف) کے سربراہ مولانا فضل الرحمان نے مولانا شیخ محمد ادریس کی ٹارگٹ کلنگ کے خلاف ملک بھر میں احتجاجی مظاہروں کا اعلان کیا ہے۔

جے یو آئی (ف) کے سربراہ مولانا فضل الرحمان نے چارسدہ میں شیخ الحدیث مولانا محمد ادریس کی فاتحہ خوانی کے موقع پر عقیدت مندوں سے مختصر خطاب کرتے ہوئے خوارج کو شدید تنقید کا نشانہ بناتے ہوئے کہا کہ تم مجاہد نہیں، بھگوڑے ہو، تمہاری حیثیت بھگوڑوں کی ہے، شرم نہیں آتی۔

انہوں نے مزید کہا کہ پاکستان کے لاکھوں علماء اسلام کو نہیں سمجھتے اور تم چند بھگوڑے اسلام کو سمجھتے ہو۔ مولانا فضل الرحمان نے اس بات پر زور دیا کہ پاکستان کے علماء کا متفقہ فیصلہ ہے کہ پاکستان کے اندر اسلحہ اٹھانا شرعاً جائز نہیں ہے۔

جے یو آئی (ف) کے سربراہ نے خوارج کو مرتد، بھگوڑے، جاہل اور دائرہ اسلام سے خارج قرار دیتے ہوئے کہا کہ اگر کسی عمل سے پاکستان کا امیج بہتر ہوتا ہے تو اس عمل کی تعریف کرتے رہیں گے۔

مولانا فضل الرحمان کے اس خطاب نے پاکستان میں بڑھتی ہوئی سیاسی اور مذہبی سرگرمیوں کے پس منظر میں اہمیت حاصل کی ہے، جہاں وہ نے اپنے خیالات کو واضح طور پر بیان کیا اور پاکستان کے علماء کی اجماع کی حمایت کی۔

مولانا فضل الرحمان نے کہا کہ ادارے فوری طور پر شیخ ادریس کے قاتلوں کو گرفتار کریں اور جمعہ کے روز پورے ملک میں ان کی شہادت کے خلاف مظاہرے ہوں گے۔ انہوں نے مزید کہا کہ آئندہ کا لائحہ عمل کراچی میں ہونے والے جلسے میں پیش کروں گا۔

یہ بھی پڑھیں: مولانا ادریس کا شہادت سے کچھ دن قبل دیا گیا بیان سوشل میڈیا پر وائرل

جے یو آئی (ف) کے سربراہ نے شیخ ادریس کی شہادت کو امت مسلمہ کے لیے بڑا صدمہ قرار دیتے ہوئے کہا کہ جو شخص امن کا پیغام دے رہا تھا، وہ خود سفاکیت کا شکار ہوگیا۔

مولانا فضل الرحمان نے حکومت اور اداروں پر کڑی تنقید کرتے ہوئے کہا کہ حکمران اور ادارے عوام کے تحفظ کے لیے مفت کی تنخواہیں نہ لیں، ملک میں فسادی خونریزی جاری ہے۔

یاد رہے کہ گزشتہ روز جے یو آئی کے صوبائی سرپرست اعلیٰ اور مولانا فضل الرحمان کے قریبی ساتھی مولانا شیخ محمد ادریس کو چارسدہ میں نامعلوم موٹر سائیکل سواروں نے مدرسے جاتے ہوئے فائرنگ کرکے شہید کردیا تھا، جس کے نتیجے میں ان کے دو محافظ بھی زخمی ہوگئے تھے۔