علی پور چٹھہ،نہر میں نہاتے ہوئے ایک ہی خاندان کے 8 افراد ڈوب گئے،4کوبچا لیاگیا

پنجاب کے شہر علی پور چٹھہ میں عیدالاضحیٰ کے موقع پر نہر پر سیر کے لیے آنے والے ایک خاندان کے آٹھ افراد نہاتے ہوئے نہر میں ڈوب گئے، جن میں چار خواتین بھی شامل ہیں۔

عینی شاہدین کے مطابق افسوسناک واقعہ کوٹ بیلہ کے علاقے میں پیش آیا، جہاں اہل خانہ نہر کے کنارے تفریح کے لیے آئے ہوئے تھے واقعے کی اطلاع ملتے ہی ریسکیو ٹیمیں فوری طور پر موقع پر پہنچ گئیں اور امدادی کارروائیاں شروع کر دیں۔

ریسکیو اہلکاروں نے بروقت کارروائی کرتے ہوئے چار افراد کو زندہ بچا لیا، جبکہ ایک خاتون کی لاش نہر سے نکال لی گئی تین خواتین تاحال لاپتہ ہیں جن کی تلاش کے لیے سرچ آپریشن کیا گیا ہے۔

یہ بھی پڑھیں :راول ڈیم میں نہاتے ہوئے تین نوجوان ڈوب گئے، دو جاں بحق، ایک کی حالت تشویشناک

پولیس بھی جائے وقوعہ پر پہنچ گئی اور جاں بحق خاتون کی لاش سمیت زخمی اور بچ جانے والے افراد کو قریبی اسپتال منتقل کر دیا گیا۔

ریسکیو حکام کے مطابق لاپتہ خواتین کی تلاش کے لیے نہر میں سرچ آپریشن کیا گیا ہے، جبکہ واقعے کے بعد علاقے میں فضا سوگوار ہو گئی ہے۔