By امریکہ کے شہر ٹیکساس میں شدید ژالہ باری اور طوفان کے نتیجے میں حادثات پیش آئے ہیں جس کے نتیجے میں 9افراد ہلاک ہو گئے۔
خبر رساں ایجنسی اے ایف پی کی رپورٹ کے مطابق آرکاناس اور اوکلوہاما طوفان کی شدید لپیٹ میں ہیں اور ہفتے کی رات سے آنے والے طوفان سے ان ریاستوں کا بڑ ا حصہ بجلی سے محروم ہے۔ ٹیکساس میں کوک کاؤنٹی کے شیرف رے سیپنگٹن کا بتا نا ہے کہ ڈیلس کے شمال میں واقع ویلی ویو ایریا میں بگولوں کی زد میں آ کر 5 افراد زندگی کی بازی ہار گئے۔ ان کا کہنا تھا کہ مجھے یہ کہتے ہوئے افسوس ہو رہا ہے کہ مرنے والوں کی تعداد میں مزید اضافے کا خدشہ ہے اور لوگوں کو نکالنے کے لیے ریسکیو کی امدادی سرگرمیاں جاری ہیں تاکہ لوگوں کو بحفاظت نکالا جا سکے ۔ انہوںنے کہا ہےکہ بگولوں کی زد میں آ کر گیس اسٹیشن کے ساتھ ساتھ کئی گھر بھی تباہ و برباد ہو گئے اور ہائی وے پر معتددگاڑیاں الٹ کر حادثے کا شکار ہوئیں۔
شیرف کا بتانا تھا کہ تباہی انتہائی سنگین نوعیت کی ہے جس میں کئی افراد زخمی بھی ہوئے لیکن کسی کو بھی سنگین نوعیت کی چوٹیں نہیں آئیں۔ دوسری جانب اوکلوہاما میں ہفتے کو رات گئے میز کاؤنٹی میں بگولوں کی زد میں آ کر دو افراد ہلاک ہو گئے۔اسی طرح شمالی آرکاناس میں اتوار کی صبح آنے والے طوفان کے نتیجے میں دو افراد جان سے ہاتھ دھو بیٹھے۔ ریاست انڈیانا میں طوفان کی وجہ سے سال کی سب سے اہم ترین ریس تصور کی جانے والی ’’انڈیا پولیس‘‘ 500کو ملتوی کردیا گیا جہاں اس ریس میں سوا لاکھ لوگوں کی آمد کا امکان تھا۔ طوفان کی شدت کا اندازہ اس بات سے لگایا جا سکتا ہے کہ ٹیکساس سے کنساس، میزوری، آرکاناس، ٹنیسی اور کین ٹکی میں تقریباً 5 لاکھ افراد بجلی سے محروم ہیں جبکہ اب بھی کئی مقامات پر بگولے بدستور متحرک ہیں۔
