فٹ بال ورلڈ کپ اب نیٹ فلکس پر، شائقین کے لیے بڑی خوشخبری

دنیا کے مقبول ویڈیو اسٹریمنگ پلیٹ فارم نیٹ فلکس نے فٹ بال کی دنیا میں اہم قدم اٹھاتے ہوئے 2030 کے مینز فیفا ورلڈ کپ کے نشریاتی حقوق حاصل کر لیے ہیں۔ اس معاہدے کے تحت اسپین اور انڈورا کے ناظرین نیٹ فلکس پر ٹورنامنٹ کے تمام 104 میچز دیکھ سکیں گے۔

یہ پہلا موقع ہوگا جب نیٹ فلکس مینز فٹ بال ورلڈ کپ کے میچز نشر کرے گا۔ اس سے پہلے کمپنی 2027 اور 2031 کے ویمنز فیفا ورلڈ کپ کے عالمی سطح پر خصوصی نشریاتی حقوق بھی حاصل کر چکی ہے۔

شائقین کے لیے ایک میچ مفت دیکھنے کا موقع

معاہدے کے مطابق اسپین میں ہر میچ ڈے پر ایک میچ مفت دکھایا جائے گا۔ اس کے علاوہ ورلڈ کپ کے منتخب میچز ایک فری ٹو ایئر ٹیلی ویژن چینل پر بھی نشر ہوں گے۔ اس پیکج میں اسپین کی قومی ٹیم کے تمام میچز، دونوں سیمی فائنلز اور فائنل شامل ہوں گے، تاکہ شائقین اہم مقابلے روایتی ٹیلی ویژن پر بھی دیکھ سکیں۔

یہ بھی پڑھیں:انگلینڈ نے پاکستان کو تیسرے ٹیسٹ میں شکست دے کر سیریز میں وائٹ واش کر دیا

برطانیہ میں نشریات کا معاملہ مختلف

برطانیہ میں ورلڈ کپ کو اہم قومی کھیلوں کے ایونٹس کی فہرست میں شامل قانونی تحفظ حاصل ہے، جسے ’کراؤن جیول‘ کہا جاتا ہے۔ اس لیے وہاں ان مقابلوں کی نشریات پر خصوصی قواعد لاگو ہوتے ہیں اور عوام کی مفت رسائی کو تحفظ دیا جاتا ہے۔

فیفا کے سیکریٹری جنرل میٹیاس گرافشٹروم کے مطابق 2026 اور 2030 کے توسیع شدہ ورلڈ کپ دنیا بھر کے فٹ بال شائقین کے لیے یادگار ایونٹس ثابت ہوں گے۔