راولپنڈی شہر اور کینٹ کے متعدد علاقوں میں تعمیراتی کام کے باعث گیس کی فراہمی عارضی طور پر معطل کرنے کا اعلان کر دیا گیا ہے۔ سوئی ناردرن گیس کمپنی کے مطابق گیس کی فراہمی کل رات ساڑھے 8 بجے سے 18 اکتوبر کی صبح 6 بجے تک بند رہے گی۔
سوئی ناردرن گیس کمپنی کے ترجمان کے مطابق پشاور روڈ انڈر پاس کے تعمیراتی کام کے سلسلے میں مین گیس پائپ لائن پر ہک اپ کیا جائے گا، جس کے باعث متاثرہ علاقوں میں گیس کی فراہمی عارضی طور پر معطل رہے گی۔
ترجمان کے مطابق مری روڈ پر صدر سے فیض آباد تک دونوں اطراف گیس کی فراہمی بند رہے گی۔ اس کے علاوہ پشاور روڈ پر گولڑہ موڑ سے صدر تک، اڈیالہ روڈ اور جی ٹی روڈ کے علاقوں میں بھی گیس کی فراہمی معطل رہے گی۔
پشاور روڈ، قاسم مارکیٹ اور ویسٹریج سمیت متعدد علاقے بھی گیس کی عارضی بندش سے متاثر ہوں گے۔
سوئی ناردرن گیس کمپنی نے صارفین کو ہدایت کی ہے کہ گیس کی فراہمی معطل ہونے کے دوران متبادل انتظامات کرلیں۔ کمپنی کے جاری کردہ شیڈول کے مطابق متاثرہ علاقوں میں 18 اکتوبر کی صبح 6 بجے گیس کی فراہمی بحال کر دی جائے گی۔
By 
