پانی پر تیرتے جزیرے، جہاں لوگ گھر بنا کر رہتے ہیں، قدرت کا حیرت انگیز کرشمہ

دنیا میں قدرت کے ایسے حیرت انگیز نظارے موجود ہیں جو انسان کو حیران کردیتے ہیں۔ بھارت کی ریاست منی پور میں واقع لوکتک جھیل بھی ایک ایسا ہی منفرد مقام ہے، جہاں پانی کی سطح پر بڑے بڑے جزیرے تیرتے دکھائی دیتے ہیں اور ان پر لوگ اپنے گھر بنا کر زندگی گزارتے ہیں۔

ان جزیروں کو مقامی زبان میں پھومدی کہا جاتا ہے۔ یہ مٹی، پودوں کی جڑوں اور گل سڑ کر جمع ہونے والے نامیاتی مادوں سے مل کر بنتے ہیں۔ پانی پر تیرنے والے یہ قدرتی جزیرے ہوا اور پانی کی سطح میں تبدیلی کے ساتھ اپنی جگہ بھی بدل سکتے ہیں۔

یہ بھی پڑھیں:آخر چاند کیوں سکڑ رہا ہے؟ سائنس دانوں نے ہزاروں دراڑیں دریافت کرلی

پھومدی کی خاص بات یہ ہے کہ ان کی موٹی تہیں پودوں اور گھاس پھوس سے بنی ہوتی ہیں، جو بعض مقامات پر انسانوں اور جانوروں کا وزن برداشت کرسکتی ہیں۔ مقامی ماہی گیر ان جزیروں پر جھونپڑیاں بناتے ہیں اور جھیل کے وسائل سے اپنی روزی کماتے ہیں۔

سائنسی اعتبار سے یہ جزیرے کئی سال کے دوران پودوں، جڑوں، مٹی اور نامیاتی مادوں کے جمع ہونے سے تشکیل پاتے ہیں۔ خشک موسم میں جب جھیل کا پانی کم ہوتا ہے تو پھومدی کا نچلا حصہ جھیل کی تہہ سے رابطہ کرکے غذائی اجزا حاصل کرسکتا ہے، جبکہ پانی کی سطح بلند ہونے پر یہ دوبارہ تیرنے لگتے ہیں۔

لوکتک جھیل کی ایک اور غیر معمولی خصوصیت کیبول لامجاؤ نیشنل پارک ہے، جسے دنیا کا واحد تیرتا ہوا نیشنل پارک کہا جاتا ہے۔ یہ پارک نایاب سانگائی ہرن کا اہم مسکن ہے، جو معدومیت کے خطرے سے دوچار ہے۔

یوں لوکتک جھیل صرف ایک قدرتی منظر نہیں بلکہ انسانوں، جنگلی حیات اور منفرد ماحولیاتی نظام کا ایسا امتزاج ہے، جو اسے دنیا کی حیرت انگیز جھیلوں میں شامل کرتا ہے۔