مشرقِ وسطیٰ میں سپلائی کے خدشات، عالمی منڈی میں تیل کی قیمتوں میں بڑا اضافہ

مشرقِ وسطیٰ میں بڑھتی ہوئی کشیدگی اور تیل کی سپلائی متاثر ہونے کے شدید خدشات کے پیشِ نظر عالمی مارکیٹ میں خام تیل کی قیمتوں میں نمایاں اضافہ ریکارڈ کیا گیا ہے۔

 بحیرۂ احمر سمیت اہم بحری گزرگاہوں اور سعودی عرب میں توانائی کی تنصیبات کو لاحق سکیورٹی خطرات کے باعث تاجروں اور سرمایہ کاروں میں شدید تشویش پائی جاتی ہے۔

قیمتوں میں نمایاں اضافہ

رپورٹس کے مطابق بین الاقوامی مارکیٹ میں برینٹ خام تیل (Brent Crude) کی قیمت میں نمایاں اضافے کے بعد یہ 110 ڈالرز فی بیرل سے اوپر چلی گئی ہے،  اسی طرح امریکی خام تیل یعنی ویسٹ ٹیکساس انٹرمیڈیٹ (WTI) کی قیمت میں بھی بڑا اضافہ دیکھا گیا ہے جو اب بڑھ کر لگ بھگ 99 سے 100 ڈالرز فی بیرل کی سطح پر پہنچ چکی ہے۔

بحران کی اصل وجوہات

تجزیہ کاروں کے مطابق حالیہ تیل بحران کے پیچھے  اہم محرکات کارفرما ہیں ، جن میں  بحیرۂ احمر اور آبنائے ہرمز کے اردگرد تجارتی بحری جہازوں اور آئل ٹینکرز کو درپیش سکیورٹی خدشات ،  خطے میں جاری کشیدگی اور اہم تنصیبات کو نشانہ بنائے جانے کے خطرات سے سپلائی چین کا متاثر ہونا شامل ہے ۔

 یہ بھی پڑھیں :عالمی منڈی میں خام تیل مزید مہنگا، برینٹ کی قیمت 106 ڈالر سے تجاوز

جیو پولیٹیکل رسک کی بات کی جائے تو  مشرقِ وسطیٰ میں جاری جنگی اور سفارتی محاذ آرائی نے عالمی توانائی مارکیٹ کو غیر یقینی صورتحال سے دوچار کر دیا ہے۔

معاشی اثرات اور عالمی تشویش

ماہرین کا کہنا ہے کہ اگر مشرقِ وسطیٰ میں تناؤ کی یہ لہراسی طرح جاری رہی تو سپلائی کے تعطل کے باعث دنیا بھر میں مہنگائی کا ایک نیا طوفان آ سکتا ہے، جس سے عام صارف کی زندگی اور عالمی صنعتی پیداوار براہِ راست متاثر ہوگی۔