شناختی کارڈ ایکسپائر ہونے کا انتظار کیوں؟نادرا نے اہم ہدایت جاری کردی

قومی شناختی کارڈ کی میعاد ختم ہونے کے قریب ہے تو شہری اس کی تجدید کے لیے آخری تاریخ کا انتظار کیے بغیر درخواست دے سکتے ہیں۔ نادرا کے مطابق شناختی کارڈ کی تجدید میعاد ختم ہونے سے پہلے بھی کسی وقت کرائی جاسکتی ہے۔

ترجمان نادرا سید شباہت علی کے مطابق اگر شناختی کارڈ کی میعاد میں ایک یا دو ماہ باقی ہیں تو شہری ابھی تجدید کروا سکتے ہیں۔ اس کے لیے کارڈ کے ایکسپائر ہونے کا انتظار کرنا ضروری نہیں۔

پہلے ہی تجدید ممکن

نادرا کے ترجمان نے واضح کیا کہ میعاد ختم ہونے سے پہلے شناختی کارڈ کی تجدید کرانے کی سہولت موجود ہے۔ تجدید کے بعد جاری ہونے والا کارڈ نیا شناختی کارڈ تصور ہوگا۔

 یہ بھی پڑھیں :صرف والد کے شناختی کارڈ پر بچے کا ب فارم بن سکتا ہے؟ نادرا نے طریقہ کار بتا دیا

اس سہولت سے شہری اپنے شناختی کارڈ کی میعاد ختم ہونے سے پہلے ہی تجدید کا عمل مکمل کرسکتے ہیں۔ یوں انہیں آخری تاریخ تک انتظار کرنے کی ضرورت نہیں رہتی۔

ڈیجیٹل کارڈ بھی اپ ڈیٹ کریں

ترجمان نادرا کے مطابق نیا شناختی کارڈ موصول ہونے کے بعد شہریوں کو پاک آئی ڈی ایپ میں موجود ڈیجیٹل شناختی کارڈ بھی اپ ڈیٹ کرنا ہوگا۔

اس مقصد کے لیے شہری پاک آئی ڈی ایپ کھول کر ڈیجیٹل شناختی کارڈ پر دوبارہ کلک کریں۔ اس کے بعد تازہ ترین شناختی کارڈ نئی تاریخِ تنسیخ کے ساتھ موبائل فون میں ڈاؤن لوڈ ہوجائے گا۔

نئی تاریخِ تنسیخ ضروری

نادرا کے ترجمان نے بتایا کہ ایپ کو ریفریش یا اپ ڈیٹ کرنے سے ڈیجیٹل شناختی کارڈ کی تفصیلات نئے کارڈ کے مطابق تبدیل ہوجائیں گی۔ اس لیے نیا شناختی کارڈ حاصل کرنے کے بعد ایپ میں موجود ڈیجیٹل ورژن کو بھی تازہ کرنا ضروری ہے۔

 یہ بھی پڑھیں :نادارا کی جانب سے شہریوں کو شناختی کارڈ آن لائن بنوانے کی سہولت کا آغاز

شہریوں کو چاہیے کہ تجدید کے بعد اپنے ڈیجیٹل شناختی کارڈ کی تفصیلات چیک کریں۔ اس طرح موبائل فون میں موجود شناختی معلومات نئے کارڈ کے مطابق رہیں گی۔