اب صرف اسٹیکر نہیں، اپنی آواز بھی بھیجیں، واٹس ایپ کا نیا فیچر

واٹس ایپ صارفین کے لیے نئے فیچرز متعارف کرانے کی تیاری، اسٹیکرز میں آواز شامل کرنے اور میسج لکھنے کے انداز میں تبدیلی پر کام شروع کر دیا گیا۔

مقبول میسجنگ ایپ واٹس ایپ صارفین کے تجربے کو مزید بہتر بنانے کے لیے نئے فیچرز پر کام کر رہی ہے۔ ان تبدیلیوں کے بعد صارفین نہ صرف اپنے اسٹیکرز کو مزید دلچسپ بنا سکیں گے بلکہ چیٹ کے دوران پیغامات لکھنا بھی پہلے سے زیادہ آسان ہو سکتا ہے۔

میڈیا رپورٹس کے مطابق، واٹس ایپ ایک ایسے فیچر کی تیاری کر رہا ہے جس کے ذریعے صارفین اپنے بنائے ہوئے اسٹیکرز میں اپنی پسند کی آواز شامل کر سکیں گے۔ اس کے علاوہ میسج ٹائپ کرنے والے باکس کے ڈیزائن میں بھی تبدیلی متوقع ہے۔

یہ بھی پڑھیں:ایپل اور میٹا کی دشمنی ختم؟ اے آئی نے دونوں کو ایک ساتھ لا کھڑا کیا

اسٹیکرز میں آواز شامل کرنے کا نیا فیچر

واٹس ایپ کے ورژن 2.26.41.11 میں ایک نئے فیچر کے شواہد سامنے آئے ہیں، جس کے ذریعے اسٹیکرز کو آواز کے ساتھ بھیجا جا سکے گا۔

اس فیچر کے تحت جب کوئی صارف تصویر سے اسٹیکر بنائے گا تو اسے اسکرین پر موجود ٹول بار میں ساؤنڈ ویو کا آئیکن دکھائی دے سکتا ہے۔ اس آپشن کے ذریعے صارف اپنی آواز ریکارڈ کر کے اسٹیکر کے ساتھ منسلک کر سکے گا یا فون میں پہلے سے محفوظ آڈیو فائل استعمال کر سکے گا۔

میڈیا رپورٹس کے مطابق، اس اسٹیکر کے ساتھ شامل کی جانے والی آواز کا دورانیہ زیادہ سے زیادہ 10 سیکنڈ ہوگا۔ اس طرح صارفین اپنے دوستوں اور اہل خانہ کو عام اسٹیکرز کے بجائے اپنی آواز والے منفرد اسٹیکرز بھی بھیج سکیں گے۔

اسٹیکرز کے ڈیزائن میں بھی تبدیلی

واٹس ایپ ایک اور سہولت پر بھی کام کر رہا ہے، جس کے ذریعے صارفین اسٹیکر بناتے وقت اس کے گرد خودکار طور پر بننے والی آؤٹ لائن کو ختم کر سکیں گے۔

 یہ بھی پڑھیں :صارفین سے جھوٹ بولنا میٹا کو مہنگا پڑ گیا؟ 25 ارب ڈالر جرمانے کا دعویٰیہ بھی پڑھیں:

اس مقصد کے لیے اسٹیکر بنانے والے ٹول میں آؤٹ لائن کو آن یا آف کرنے کا آپشن دیا جا سکتا ہے، جس سے صارفین اپنے اسٹیکرز کی شکل اپنی پسند کے مطابق تبدیل کر سکیں گے۔

میسج لکھنے والا باکس بھی بدلنے والا ہے؟

واٹس ایپ کے ایک اور زیرِ غور فیچر میں میسج کمپوزیشن باکس کا ڈیزائن تبدیل کرنا شامل ہے۔ مجوزہ ڈیزائن میں میسج لکھنے کے لیے دو لائنوں پر مشتمل باکس دکھائی دے گا۔ اس میں پہلی لائن پر پیغام ٹائپ کیا جائے گا، جبکہ اٹیچمنٹ، GIF، اسٹیکرز اور تصاویر جیسے آپشنز نیچے والی لائن میں منتقل ہو سکتے ہیں۔ اس تبدیلی کا مقصد چیٹ کے دوران مختلف آپشنز تک رسائی کو آسان بنانا اور میسج لکھنے کی جگہ کو بہتر انداز میں ترتیب دینا ہے۔