امریکا کا ایک اور طیارہ گر کر تباہ ہوگیا

امریکی ریاست پینسلوینیا کی لنکاسٹر کاؤنٹی میں ایک چھوٹا طیارہ گر کر تباہ ہو گیا جس کے نتیجے میں طیارے میں سوار دو افراد جھلس کر زخمی ہو گئے۔ حادثے کے بعد امدادی اداروں نے فوری کارروائی کرتے ہوئے دونوں زخمیوں کو جائے حادثہ سے نکال کر ہیلی کاپٹر کے ذریعے اسپتال منتقل کر دیا۔

غیر ملکی میڈیا رپورٹس کے مطابق لنکاسٹر کاؤنٹی پولیس کا کہنا ہے کہ حادثے کا شکار ہونے والے طیارے میں صرف دو افراد سوار تھے جن کے بارے میں ابتدائی طور پر خیال ظاہر کیا جا رہا ہے کہ دونوں پائلٹ تھے۔ دونوں افراد طیارے کے ملبے کے قریب زخمی حالت میں ملے جنہیں ریسکیو اہلکاروں نے فوری طبی امداد فراہم کرنے کے بعد ایئر ایمبولینس کے ذریعے اسپتال منتقل کیا۔

پولیس حکام کے مطابق حادثے کے بعد جائے وقوعہ کو گھیرے میں لے کر امدادی کارروائیاں مکمل کر لی گئی ہیں جبکہ علاقے میں حفاظتی اقدامات بھی سخت کر دیے گئے تاکہ کسی بھی ممکنہ خطرے سے بچا جا سکے۔

امریکی فیڈرل ایوی ایشن ایڈمنسٹریشن (FAA) نے تصدیق کی ہے کہ حادثے کا شکار ہونے والا طیارہ بیچ کرافٹ BE55 ماڈل کا تھا۔ ابتدائی معلومات کے مطابق یہ طیارہ ریاست مسیسیپی کے پوپلارویل پرل کاؤنٹی ایئرپورٹ سے روانہ ہوا تھا اور اسے شمالی کیرولینا کے اسٹینلی کاؤنٹی ایئرپورٹ پہنچنا تھا تاہم دورانِ پرواز لنکاسٹر کاؤنٹی میں حادثے کا شکار ہو گیا۔

یہ بھی پڑھیں:مودی کے زخم پھر تازہ، ٹرمپ کا پاک بھارت جنگ میں 11 طیاروں کے گرنے کا نیا بیان آ گیا

ایف اے اے کے حکام کا کہنا ہے کہ حادثے کی وجوہات فوری طور پر معلوم نہیں ہو سکیں تاہم واقعے کی مکمل تحقیقات کا آغاز کر دیا گیا ہے۔ تحقیقاتی ٹیمیں طیارے کے ملبے، پرواز کے ریکارڈ اور موسمی حالات کا جائزہ لے رہی ہیں تاکہ حادثے کی اصل وجہ معلوم کی جا سکے۔

حکام نے بتایا کہ خوش قسمتی سے طیارہ کسی گنجان آباد علاقے پر نہیں گرا، جس کے باعث زمین پر کسی جانی نقصان یا اضافی زخمی ہونے کی اطلاع موصول نہیں ہوئی۔ پولیس اور ایوی ایشن حکام نے عوام سے اپیل کی ہے کہ تحقیقات مکمل ہونے تک حادثے سے متعلق غیر مصدقہ اطلاعات سے گریز کیا جائے۔