کوئٹہ سے پشاور جانیوالی مسافر بس گہری کھائی میں جا گری، حادثہ میں 24 افراد جاں بحق

خیبرپختونخوا اور بلوچستان کی سرحد کے قریب واقع علاقے دانا سر میں ایک افسوسناک ٹریفک حادثے کے نتیجے میں مسافر کوچ گہری کھائی میں جا گری جس کے باعث 24 افراد جاں بحق جبکہ متعدد مسافر زخمی ہو گئے۔ حادثے کے بعد علاقے میں امدادی کارروائیاں فوری طور پر شروع کر دی گئیں۔

پولیس حکام کے مطابق مسافر کوچ کوئٹہ سے پشاور جا رہی تھی کہ ژوب اور ڈیرہ اسماعیل خان کے درمیانی پہاڑی علاقے دانا سر میں ڈرائیور سے گاڑی بے قابو ہو کر گہری کھائی میں جا گری۔ حادثہ انتہائی دشوار گزار مقام پر پیش آنے کے باعث امدادی کارروائیوں میں مشکلات کا سامنا کرنا پڑا۔

ڈپٹی کمشنر شیرانی ولی کاکڑ نے بتایا کہ ریسکیو اہلکار پولیس اور ضلعی انتظامیہ موقع پر پہنچ کر امدادی سرگرمیوں میں مصروف ہیں۔ کھائی میں گری کوچ سے زخمیوں اور لاشوں کو نکالنے کا عمل جاری ہے جبکہ جاں بحق اور زخمی ہونے والوں کی تعداد میں اضافے کا بھی خدشہ ظاہر کیا جا رہا ہے۔

یہ بھی پڑھیں:بلوچستان حکومت کا بڑا فیصلہ، شاہراہوں پر کنوائے سسٹم متعارف کرانے کا اعلان

انہوں نے بتایا کہ زخمیوں کو ابتدائی طبی امداد فراہم کرنے کے بعد قریبی ہسپتالوں میں منتقل کیا جا رہا ہے جبکہ ضلعی انتظامیہ صورتحال کی مسلسل نگرانی کر رہی ہے۔ امدادی کارروائیاں مکمل ہونے کے بعد ہی جانی نقصان کی حتمی تعداد اور متاثرہ افراد کی شناخت سے متعلق تفصیلات جاری کی جائیں گی۔

دوسری جانب محکمہ صحت نے حادثے کے پیش نظر بلوچستان کے قریبی سرکاری ہسپتالوں میں ایمرجنسی نافذ کر دی ہے۔ تمام طبی عملے کو الرٹ رہنے اور زخمیوں کو فوری اور بہترین طبی سہولیات فراہم کرنے کی ہدایت جاری کر دی گئی ہے۔

ابتدائی اطلاعات کے مطابق حادثے کی وجہ تاحال سامنے نہیں آ سکی تاہم پولیس نے واقعے کی تحقیقات شروع کر دی ہیں۔ حکام کا کہنا ہے کہ کوچ کے تکنیکی معائنے سڑک کی صورتحال اور دیگر ممکنہ عوامل کا جائزہ لیا جا رہا ہے تاکہ حادثے کی اصل وجہ معلوم کی جا سکے۔