‘چاچا کرکٹ’ اب کبھی اسٹیڈیم نہیں آسکیں گے

پاکستان کرکٹ کے مشہور سپر فین چوہدری عبدالجلیل، جنہیں دنیا بھر میں چاچا کرکٹ کے نام سے جانا جاتا ہے، نے اعلان کیا ہے کہ وہ آسٹریلیا کے خلاف آئندہ ہوم ون ڈے سیریز کے دوران آخری مرتبہ اسٹینڈز میں نظر آئیں گے۔

76 سالہ چاچا کرکٹ نے تصدیق کی کہ 30 مئی سے 4 جون تک شیڈول تین میچوں کی سیریز عمر سے متعلق صحت کے خدشات کے باعث لائیو اسٹیڈیم میں ان کی شرکت کا اختتام ہوگی۔

پاکستان پہلے ون ڈے میں راولپنڈی میں آسٹریلیا کی میزبانی کرے گا جبکہ آخری دو میچ لاہور میں کھیلے جائیں گے۔

چاچا کرکٹ نے اپنے آفیشل سوشل میڈیا پلیٹ فارم ایکس پر جذباتی پیغام میں پاکستان کرکٹ بورڈ اور چیئرمین محسن نقوی سے درخواست کی کہ 4 جون کو لاہور کے قذافی اسٹیڈیم میں ان کی الوداعی کو یادگار بنایا جائے۔

یہ بھی پڑھیں: آسٹریلوی کرکٹ ٹیم پاکستان پہنچ گئی، راولپنڈی میں پہلا میچ، انتظامات مکمل، پاکستانی اسکواڈ میں 3 نئے چہرے سامنے آگئے

انہوں نے لکھا کہ وہ 4 جون کو پاک بمقابلہ آسٹریلیا میچ میں قذافی اسٹیڈیم میں اپنا آخری ون ڈے دیکھیں گے۔ انہوں نے چیئرمین محسن نقوی اور پی سی بی انتظامیہ سے درخواست کی کہ اس دن کو یادگار بنایا جائے اور اختتام شاندار انداز میں ہو۔ ان کے مطابق منیجر آپریشنز اینڈ ایونٹس کو ای میل بھیجی جا چکی ہے اور وہ پی سی بی کے مثبت جواب کے منتظر ہیں۔

اپنے پیغام میں چاچا کرکٹ نے کئی دہائیوں تک ملنے والی حمایت پر اظہار تشکر کیا اور اس تاریخی مقام پر مناسب خراج تحسین کی خواہش ظاہر کی، جہاں وہ نسلوں سے پاکستان ٹیم کی حوصلہ افزائی کرتے رہے ہیں۔