By گورنر اسٹیٹ بینک جمیل احمد نے واضح کیا ہے کہ 5 ہزار روپے کے کرنسی نوٹ ختم کرنے کی ابھی کوئی تجویز زیرغور نہیں ہے۔
انہوں نے کہا کہ ڈیجیٹل اور پلاسٹک کرنسی پر کام جاری ہے‘پہلے کسی ایک مالیت کا نوٹ پلاسٹک کرنسی کے طور پر لایا جائے گا‘پلاسٹک کرنسی پر بھی کرنے کے ساتھ نئے نوٹ لانے پر کام کر رہے ہیں، نئے ڈیزائن کے نوٹ پر کام مکمل ہونے پر کابینہ میں لائیں گے، سال کے اختتام تک اس پر اپنے طور پر کام مکمل کرلیں گے،اگر تجربہ کامیاب رہتا ہے تو پھر اس کو مزید وسعت دیں گے۔
گورنر اسٹیٹ بینک نے رواں سال دسمبر تک پلاسٹک کرنسی متعارف کروانے کا عندیہ دیدیا
انہوں نے کہا کہ نئے ڈیزائن کے نوٹ آنے کے بعد پانچ سالوں میں بالترتیب پرانے نوٹ ختم کریں گے۔سینیٹ کمیٹی برائے خزانہ کا اجلاس سینیٹر سلیم مانڈوی والا کی زیر صدارت ہوا، جس میں رکن کمیٹی سینیٹر محسن عزیز نے 5 ہزار روپے کا نوٹ ختم کرنے کی تجویز پیش کی۔انہوں نے کہا کہ 5 ہزار روپے کا نوٹ کرپشن سمیت دیگر مسائل کی وجہ بن رہا ہے‘پانچ ہزار روپے کا نوٹ اگر بند کردیا تو یقین دلاتا ہوں مارکیٹ میں یہ نوٹ تین ہزار کا فروخت ہوگا۔
گورنر اسٹیٹ بینک نے بتایا کہ پلاسٹک کے نئے نوٹ لانے کے لیے کابینہ سے منظوری لی جائے گی ‘پلاسٹک کرنسی کے لیے دیکھا جائے گا کہ اس کی عمر کیا ہے، فی نوٹ لاگت کیا ہے، یہ بھی دیکھا جائے گا کہ سکیورٹی فیچر کس قدر پائیدار اور طویل ہیں۔ابھی ٹیسٹ کے لیے ابتدائی طور پر ایک نوٹ پلاسٹک کرنسی میں متعارف کروانا چاہ رہے ہیں، اگر یہ نوٹ پائیدار ہوئے اور سکیورٹی فیچر لانگ ٹرم ہوئے تو ہم متعارف کروائیں گے ورنہ یہ شاید قابل عمل نہ ہو۔
