گرین کارڈ رولز پر وضاحت آگئی ، بیشتر تارکین وطن کو امریکا نہیں چھوڑنا پڑے گا

امریکا کے محکمۂ داخلی سلامتی نے واضح کیا ہے کہ گرین کارڈ کے حصول کے لیے درخواست دینے والے بیشتر تارکینِ وطن کو درخواستوں کی جانچ کے دوران امریکا چھوڑنے کی ضرورت نہیں ہو گی۔

امریکا میں مستقل رہائش کا خواب دیکھنے والے لاکھوں تارکینِ وطن کے لیے ایک اہم وضاحت سامنے آگئی ہے ، حالیہ دنوں میں گردش کرنے والی خبروں نے متعدد افراد کو پریشان کر دیا تھا کہ شاید گرین کارڈ درخواست جمع کرانے کے بعد انہیں امریکا چھوڑ کر اپنے آبائی ممالک واپس جانا پڑے گا تاہم امریکی حکام کی نئی وضاحت نے اس خدشے کو بڑی حد تک دور کر دیا ہے۔

گرین کارڈ درخواست سے متعلق ابہام کیسے پیدا ہوا؟

بین الاقوامی میڈیا رپورٹس کے مطابق حال ہی میں امریکی شہریت و امیگریشن سروسز کے ایک اعلان نے کئی سوالات کو جنم دیا تھا، بعض حلقوں نے اس اعلان کو نئی پالیسی سمجھ لیا اور یہ تاثر پھیل گیا کہ درخواست گزاروں کو فیصلے تک اپنے ممالک واپس جانا ہوگا۔

تاہم محکمۂ داخلی سلامتی نے بعد میں وضاحت کی کہ یہ کوئی نئی پالیسی نہیں ، دراصل حکام نے صرف امیگریشن افسران کو ان اختیارات کی یاددہانی کرائی ہے جو انہیں پہلے سے حاصل ہیں۔ ہر درخواست کا جائزہ انفرادی بنیاد پر لیا جاتا ہے اور فیصلے بھی کیس کی نوعیت کے مطابق کیے جاتے ہیں۔

کن افراد کے لیے صورتحال مختلف ہو سکتی ہے؟

امریکی حکام کے مطابق بعض معاملات میں ویزا مدت سے زیادہ قیام یا دیگر امیگریشن مسائل درخواست کے نتائج پر اثر ڈال سکتے ہیں،  ایسے کیسز میں اضافی جانچ پڑتال کی جا سکتی ہے۔

تاہم اچھی خبر یہ ہے کہ زیادہ تر افراد کو امریکا میں رہتے ہوئے اپنی گرین کارڈ درخواست کے فیصلے کا انتظار کرنے کی اجازت بدستور حاصل رہے گی،  اس لیے عام درخواست گزاروں کو فوری طور پر کسی بڑی تبدیلی یا اضافی پریشانی کا سامنا نہیں کرنا پڑے گا۔

تارکینِ وطن کے لیے اس اعلان کی اہمیت

امیگریشن ماہرین کے مطابق یہ وضاحت ہزاروں خاندانوں کے لیے اہم ہے جو اپنی قانونی حیثیت بہتر بنانے کے عمل سے گزر رہے ہیں ، اگر درخواست گزاروں کو امریکا چھوڑنا پڑتا تو انہیں ملازمت، تعلیم اور خاندانی زندگی سمیت متعدد مسائل کا سامنا کرنا پڑ سکتا تھا۔

اسی لیے اس وضاحت کو تارکینِ وطن کے لیے ایک مثبت پیش رفت قرار دیا جا رہا ہے ، مستقبل میں بھی درخواست گزاروں کو اپنی امیگریشن دستاویزات مکمل اور درست رکھنے کی ضرورت ہوگی تاکہ ان کے کیسز بغیر کسی رکاوٹ کے آگے بڑھ سکیں۔

 یہ بھی پڑھیں :نئے سال کے آغاز کے ساتھ ہی امریکا میں امیگریشن سے متعلق نئے قوانین نافذ

آخر میں امریکی حکام نے ایک بار پھر واضح کیا ہے کہ گرین کارڈ درخواست کے موجودہ طریقۂ کار میں کوئی بڑی تبدیلی نہیں کی گئی اور بیشتر درخواست گزار امریکا میں رہتے ہوئے ہی اپنے کیس کے فیصلے کا انتظار کر سکیں گے۔