By خیبرپختونخوا کے بالائی اضلاع میں آج سے منگل تک تیز ہواؤں اور گرج چمک کے ساتھ بارش کا امکان ہے۔
پراونشل ڈیزاسٹر مینجمنٹ اتھارٹی کی جانب سے جاری کردہ موسمی انتباہ کے مطابق کل سے صوبے کے بالائی علاقوں میں مغربی ہواؤں کا اثر شروع ہوگا۔ اس کے نتیجے میں چترال، دیر، سوات، کوہستان، شانگلہ، بٹگرام، مانسہرہ، ایبٹ آباد، ہری پور، بونیر، مالاکنڈ، باجوڑ، مہمند، خیبر، پشاور، صوابی، چارسدہ اور نوشہرہ میں آندھی اور گرج چمک کے ساتھ بارش کا امکان ہےجبکہ کچھ مقامات پر موسلادھار بارش بھی ہو سکتی ہے۔
ترجمان کے مطابق 5 سے 7 اکتوبر کے دوران مردان، کرم، اورکزئی، کوہاٹ، ہنگو، بنوں، لکی مروت، وزیرستان اور ڈیرہ اسماعیل خان میں بھی آندھی اور گرج چمک کے ساتھ درمیانی بارش کی توقع ہے۔ موسلادھار بارش کے باعث مانسہرہ، کوہستان، چترال، گلگت بلتستان، دیر، سوات، شانگلہ، نوشہرہ اور صوابی کے مقامی ندی نالوں میں پانی کی سطح بلند ہونے، نشیبی علاقوں میں اربن فلڈنگ اور بالائی علاقوں میں لینڈ سلائیڈنگ کا خدشہ ہے۔
پی ڈی ایم اے نے تمام ضلعی انتظامیہ کو موسمی صورتحال کے پیش نظر الرٹ جاری کر دیا ہے۔ ان ہدایات میں کہا گیا ہے کہ جھکڑ چلنے اور گرج چمک کے باعث کسی بھی ناخوشگوار واقعے سے نمٹنے کے لیے تیاری کی جائے اور چھوٹی بڑی مشینری کی دستیابی یقینی بنائی جائے۔ تیز ہواؤں کے دوران عوام کو بجلی کی تاروں، بوسیدہ عمارتوں، سائن بورڈز اور بل بورڈز سے دور رہنے کی ہدایت کی گئی ہے۔
کسان حضرات کو بھی موسمیاتی پیش گوئی کے مطابق اپنے معمولات ترتیب دینے کی صلاح دی گئی ہے۔ پی ڈی ایم اے نے حساس بالائی علاقوں میں سیاحوں اور مقامی آبادی کو موسمی حالات سے باخبر رہنے کے لیے احتیاطی تدابیر اپنانے کی ہدایت کی ہے۔ عوام کو آگاہ کیا گیا ہے کہ کسی بھی ہنگامی صورتحال میں تمام متعلقہ ادارے روڈ لنکس کی بحالی میں چوکس رہیںاور سڑک بند ہونے کی صورت میں متبادل راستے فراہم کیے جائیں۔
پی ڈی ایم اے کا ایمرجنسی آپریشن سینٹر مکمل طور پر فعال ہےاور عوام کسی بھی ناخوشگوار واقعے کی اطلاع پی ڈی ایم اے کی فری ہیلپ لائن 1700 پر دے سکتے ہیں۔
