پی ٹی آئی کا 9 نومبر کو صوابی میں جلسہ منسوخ نہیں ہوا،بیرسٹر گوہر

پاکستان تحریک انصاف کے چیئرمین بیرسٹر گوہر نے واضح کیا ہے کہ پارٹی کا 9 نومبر کو صوابی میں ہونے والا جلسہ منسوخ نہیں ہوا اور یہ ایک بڑا جلسہ ہوگا۔

تفصیلات کے مطابق بونیر میں میڈیا سے گفتگو کرتے ہوئے انہوں نے کہا کہ پی ٹی آئی میں اختلاف رائے موجود ہے، لیکن اس کے باوجود پارٹی میں کوئی فارورڈ بلاک نہیں ہے اور تمام اراکین بانی پی ٹی آئی عمران خان کی قیادت میں متحد اور منظم ہیں۔

یہ بھی پڑھیں: لاہور نے ایک بار پھر آلودگی میں دنیا کو پیچھے چھوڑ دیا، پرائمری اسکول ایک ہفتے کیلئےبند

بیرسٹر گوہر نے مزید بتایا کہ عمران خان کی مشاورت کے بغیر کوئی بھی پارٹی میں اختیارات کا استعمال نہیں کر سکتا۔ انہوں نے اس بات پر زور دیا کہ صوابی میں ہونے والا جلسہ حکومتی ظلم اور مہنگائی کے خلاف ہے، جبکہ اس کا مقصد عمران خان کی رہائی کے لیے لائحہ عمل تیار کرنا ہے۔

چیئرمین پی ٹی آئی نے مولانا فضل الرحمان کی 26 ویں ترمیم میں اہم کردار کو سراہتے ہوئے کہا کہ ان کے ساتھ اچھے تعلقات برقرار رہیں گے۔ انہوں نے انتظار پنجوتھا کی رہائی کے موقع پر غیر انسانی سلوک کو ظلم قرار دیا۔