برطانوی ہاؤس آف لارڈز میں پاکستان کے ایران امریکہ تنازعہ میں ثالثی کردار کی تعریف

برطانوی پارلیمنٹ کے ایوانِ بالا ہاؤس آف لارڈز میں امریکہ اور ایران کے درمیان کشیدگی کم کرنے اور امن کی کوششوں کے حوالے سے پاکستان کے کردار کو سراہا گیا ہے۔ برطانوی اراکینِ پارلیمنٹ نے پاکستان کی سفارتی کوششوں اور وزیرِاعظم محمد شہباز شریف کے کردار کو اہم قرار دیا۔ برطانوی پارلیمنٹ کے ہاؤس آف لارڈز میں مشرقِ وسطیٰ کی صورتحال پر ہونے والی بحث کے دوران پاکستان کی سفارتی کوششوں کی تعریف کی گئی ۔

برطانوی حکومت کی نمائندگی کرتے ہوئے بیرونس چیپمین آف ڈارلنگٹن نے پاکستان کے کردار کو سراہا اور کہا کہ امریکہ اور ایران کو موجودہ مقام تک پہنچانے میں پاکستان نے اہم کردار ادا کیا۔بحث کے دوران وزیرِاعظم محمد شہباز شریف کی سفارتی کوششوں کا بھی ذکر ہوا۔

لارڈ باربر آف چٹل ہیمپٹن نے برطانوی حکومت سے مطالبہ کیا کہ وزیرِاعظم شہباز شریف کو امن کی کوششوں پر مبارکباد پیش کی جائے۔

 یہ بھی پڑھیں :پاکستان امن کا سفیر بن گیا! امریکہ ایران تنازعہ ختم،معاہدہ طے پا گیا ، شہباز شریف کا اعلان

جواب میں بیرونس چیپمین نے کہا کہ پاکستان کے وزیرِاعظم شہباز شریف نے اچھا کام کیا ہے اور وہ تعریف کے مستحق ہیں،بحث میں متعدد اراکین نے خطے میں مذاکرات کے فروغ، کشیدگی میں کمی اور امن کی کوششوں کے لیے پاکستان کے کردار کو سراہا۔

 یہ بھی پڑھیں :امریکہ ایران امن معاہدہ: ’’نوبل پیس پرائز فار فیلڈ مارشل عاصم منیر‘‘ ایکس پر ٹاپ ٹرینڈ بن گیا

لارڈ احمد آف ومبلڈن نے پاکستان کی کاوشوں کو خراجِ تحسین پیش کرتے ہوئے کہا کہ ایوان پاکستان کے اہم کردار کو تسلیم کرے گا۔ انہوں نے پاکستان اور قطر کی معاونت کا شکریہ ادا کیا۔لارڈ احمد نے اردو زبان میں بھی کہا:“پاکستان کا بہت بہت شکریہ”