سعودی عرب کے علاقے القصیم میں موسلادھار بارش ا ورآندھی

القصیم میں اچانک موسلا دھار بارش اور تیز آندھی کے باعث معمولاتِ زندگی شدید متاثر ہو گئے، بارش کے ساتھ چلنے والی تیز ہواؤں نے کئی علاقوں میں نظامِ آمدورفت کو متاثر کیا جبکہ بعض مقامات پر پانی جمع ہونے کے باعث سڑکیں زیرِ آب آ گئیں۔

رپورٹس کے مطابق آندھی کے دوران گردوغبار کے بادل بھی فضا میں پھیل گئے جس سے حدِ نگاہ کم ہو گئی اور شہریوں کو مشکلات کا سامنا کرنا پڑا۔

تیز ہواؤں کے باعث کئی کمزور ڈھانچے اور عارضی تنصیبات کو بھی نقصان پہنچنے کی اطلاعات ہیں، تاہم کسی بڑے جانی نقصان کی فوری طور پر کوئی اطلاع موصول نہیں ہوئی۔

یہ بھی پڑھیں :سعودی عرب میں بارشوں کا حالیہ سلسلہ مزید جاری رہ سکتا ہے، محکمہ موسمیات

مقامی انتظامیہ نے شہریوں کو ہدایت کی ہے کہ وہ غیر ضروری طور پر گھروں سے باہر نکلنے سے گریز کریں اور احتیاطی تدابیر اختیار کریں۔ خاص طور پر ڈرائیورز کو ہدایت کی گئی ہے کہ خراب موسمی حالات کے پیش نظر گاڑی احتیاط سے چلائیں اور رفتار کم رکھیں۔

محکمہ موسمیات کے مطابق آئندہ چند گھنٹوں کے دوران مزید بارش اور تیز ہواؤں کا امکان موجود ہے، جس کے پیش نظر ہنگامی اداروں کو الرٹ رہنے کی ہدایت جاری کر دی گئی ہے۔ حکام کا کہنا ہے کہ کسی بھی ممکنہ صورتحال سے نمٹنے کے لیے تمام ضروری اقدامات کیے جا رہے ہیں۔