وزیراعظم شہباز شریف نے کابینہ میں توسیع کا فیصلہ کرلیا

اسلام آباد: وزیراعظم شہباز شریف نے اپنی کابینہ میں توسیع کرنے کا فیصلہ کرلیا ہے، اور توقع کی جا رہی ہے کہ آئندہ ہفتے کے دوران 4 سے 5 نئے وزرا کو کابینہ میں شامل کیا جائے گا تاہم یہ بات ابھی تک واضح نہیں ہو سکی کہ پیپلز پارٹی یا دیگر اتحادی جماعتوں سے کسی کو کابینہ میں شامل کیا جائے گا یا نہیں۔

ذرائع کے مطابق وزیراعظم کے قریبی ساتھی ڈاکٹر توقیر شاہ موجودہ اور پی ڈی ایم حکومت میں وزیراعظم کے پرنسپل سیکریٹری کے طور پر خدمات انجام دے چکے ہیں، کابینہ کا حصہ بن سکتے ہیں۔ ڈاکٹر توقیر اس وقت عالمی بینک میں کام کر رہے ہیں اور انہیں وزیراعظم نے پاکستان واپس طلب کیا ہے۔

کابینہ میں شمولیت کے دیگر ممکنہ امیدواروں میں حنیف عباسی، طارق فضل چوہدری، بیرسٹر عقیل ملک اور طلال چوہدری شامل ہیں۔ بیرسٹر عقیل ملک نے اس بات کی تصدیق کی ہے کہ انہیں وفاقی وزارت دی جا رہی ہے تاہم وہ ابھی تک نہیں جانتے کہ انہیں کون سی وزارت دی جائے گی۔ طارق فضل چوہدری کے قریبی ذرائع نے بھی ان کی کابینہ میں شمولیت کی تصدیق کی ہے۔

وزیراعظم نے مسلم لیگ (ن) کی پارلیمانی پارٹی کے اجلاس کے دوران عندیہ دیا تھا کہ کابینہ میں نئے چہروں کو شامل کیا جا سکتا ہے اور کچھ وزرا کے قلمدانوں میں تبدیلیاں کی جا سکتی ہیں۔ ذرائع کے مطابق وزیراعظم کابینہ میں شمولیت سے قبل نئے وزیروں سے ملاقات کریں گے، اور سینیٹر خلیل طاہر سندھو اور اختیار ولی کو بھی وزارت کے لیے زیر غور رکھا جا رہا ہے۔

وزیراعظم کی موجودہ کابینہ 19 ارکان پر مشتمل ہے، جس کی تشکیل 11 مارچ 2024 کو ہوئی تھی۔ اس دوران وزیر اطلاعات عطا اللہ تارڑ کے قلمدان میں تبدیلی کا امکان بھی ظاہر کیا جا رہا ہے کیونکہ وزیراعظم نے پہلے ہی اعلان کیا تھا کہ ان کی کابینہ کے کسی بھی رکن کو حکومت کے کفایت شعاری اقدامات کے تحت تنخواہ اور دیگر مراعات نہیں مل رہی ہیں۔ اب وزیراعظم کے کابینہ میں مزید وزرا سے وفاقی خزانے پر کتنا بوجھ بڑھے گا، اس بارے میں کہنا قبل از وقت ہوگا۔