سانحہ 9 مئی 2023ء کے 19 مجرمان کی سزاؤں میں معافی کا اعلان

آرمی چیف جنرل سید عاصم منیر نے سانحہ 9 مئی 2023ء کے 19 مجرمان کی سزاؤں کی معافی کا اعلان کیا ہے۔

پاک فوج کے شعبہ تعلقات عامہ (آئی ایس پی آر) کے مطابق سانحہ 9 مئی کی سزاؤں پر عمل درآمد کے دوران مجرمان نے قانونی طور پر رحم اور معافی کی درخواستیں دائر کیں۔ مجموعی طور پر 67 مجرمان نے رحم کی درخواستیں دائر کیں، جن میں سے 48 درخواستوں کو قانونی کارروائی کے لیے “کورٹس آف اپیل” میں نظرثانی کے لیے ارسال کیا گیا۔

آئی ایس پی آر کے مطابق 19 مجرمان کی درخواستیں صرف انسانی بنیادوں پر قانون کے مطابق منظور کی گئیں اور دیگر رحم کی درخواستوں پر عمل درآمد مقررہ مدت میں قانونی طور پر کیا جائے گا۔ معاف کیے جانے والے مجرمان میں محمد ایاز، سمیع اللہ، لئیق احمد، امجد علی، یاسر نواز، سیعد عالم، زاہد خان، محمد سلیمان، حمزہ شریف، محمد سلمان، اشعر بٹ، محمد وقاص، سفیان ادریس، منیب احمد، محمد احمد، محمد نواز، محمد علی، محمد بلاول اور محمد الیاس کے نام شامل ہیں۔

آئی ایس پی آر کے مطابق ان مجرمان کو ضابطے کی کارروائی مکمل ہونے کے بعد رہا کیا جا رہا ہے اور دیگر تمام مجرمان کے پاس بھی اپیل کرنے اور قانون و آئین کے مطابق دیگر حقوق حاصل ہیں۔ سزاؤں کی معافی پاکستان کے عدلیہ کے منصفانہ اور مضبوط عمل کی عکاسی کرتی ہے جو کہ انسانی ہمدردی اور رحم کے اصولوں کو مدنظر رکھتے ہوئے انصاف فراہم کرنے کی ضمانت دیتی ہے۔

یاد رہے کہ اس سے قبل اپریل 2024 میں بھی 20 مجرمان کی رہائی کا حکم انسانی ہمدردی کی بنیاد پر صادر کیا گیا تھا۔