محکمہ موسمیات نے پنجاب سمیت ملک کے بیشتر علاقوں میں گرج چمک کے ساتھ بارش کی پیش گوئی کر دی۔
محکمہ موسمیات کے مطابق آج رات ملک کے زیادہ تر علاقے سرد اور خشک رہیں گے، جبکہ پہاڑی علاقوں میں شدید سردی کا امکان ہے۔ تاہم شمال مشرقی پنجاب میں درمیانی سے شدید جبکہ جنوبی پنجاب اور بالائی سندھ میں ہلکی سے درمیانی دُھند چھائے رہنے کی توقع ہے۔
جمعہ کے روز اسلام آباد اور گردونواح میں موسم سرد اور خشک رہنے کا امکان ہے، تاہم شام یا رات کے وقت مطلع جزوی طور پر ابر آلود رہنے کی پیش گوئی کی گئی ہے۔ خیبرپختونخوا کے بیشتر اضلاع میں موسم سرد رہے گا اور شام/رات میں مطلع جزوی طور پر ابر آلود رہنے کا امکان ہے، جبکہ پہاڑی علاقوں میں شدید سردی متوقع ہے۔
بنوں، لکی مروت، ڈیرہ اسماعیل خان اور گردونواح میں صبح اور رات کے اوقات میں ہلکی دھند پڑنے کی توقع ہے۔ پنجاب کے بیشتر اضلاع میں موسم سرد اور خشک رہنے کی پیش گوئی کی گئی ہے، تاہم مری، گلیات اور ان کے گردونواح میں شدید سردی کی توقع ہے۔
صبح اور رات کے اوقات میں سیالکوٹ، نارووال، گوجرانوالہ، منگلا، جہلم، لاہور، شیخوپورہ، قصور، اوکاڑہ، ساہیوال میں درمیانی سے شدید جبکہ فیصل آباد، بہاولپور، بہاولنگر، رحیم یار خان، ملتان، ڈیرہ غازی خان اور گردونواح میں ہلکی سے درمیانی دھند پڑنے کا امکان ہے۔
رات کے اوقات میں رحیم یار خان، خان پور، بہاولنگر، بہاولپور، پاکپتن، خانیوال اور گرد و نواح میں گرج چمک کے ساتھ بارش کا امکان ہے۔ بلوچستان کے بیشتر اضلاع میں موسم سرد اور خشک رہے گا، تاہم پہاڑی علاقوں میں صبح اور رات کے اوقات میں شدید سردی کا امکان ہے۔
لسبیلہ، خضدار اور قلات میں جزوی طور پر ابر آلود موسم کے ساتھ تیز ہواؤں اور گرج چمک کے ساتھ بارش متوقع ہے۔ سندھ کے بیشتر اضلاع میں موسم سرد اور خشک رہے گا۔ تاہم شام اور رات کے اوقات میں گھوٹکی، سکھر، خیر پور، شہید بینظیر آباد، سانگھڑ، عمرکوٹ، تھر پارکر اور گردونواح میں تیز ہواؤں اور گرج چمک کے ساتھ بارش کا امکان ہے۔ کشمیر اور گلگت بلتستان میں موسم شدید سرد اور خشک رہنے کی پیش گوئی کی گئی ہے۔
By 
