شوکت یوسفزئی نے عمران خان کیخلاف فیصلے کو سیاسی انتقام قرار دیدیا

پاکستان تحریک انصاف (پی ٹی آئی)کے سینئر رہنما شوکت یوسفزئی نے 190 ملین پاؤنڈز ریفرنس کے فیصلے کو سیاسی انتقام قرار دیدیا۔

تفصیلات کے مطابق نجی ٹی وی چینل کا اپنی رپورٹ میں بتانا ہے کہ شوکت یوسفزئی نے کہا کہ آج آئین، انصاف اور قانون کی دھجیاں اڑائی گئیں، آج کا دن سیاہ دن کے طور پر یاد رکھا جائے گا۔

یہ بھی پڑھیں:190 ملین پاؤنڈز کیس کا فیصلہ مکافات عمل ہے ، خواجہ آصف کا بیان

رہنماء پی ٹی آئی عمران خان اور بشریٰ بی بی کی سزا کے فیصلے پر رد عمل دیتے ہوئے کہا کہ اس فیصلے میں حکومت کی بدنیتی بھی عیاں ہیں، فیصلے سے ملک میں جاری سیاسی استحکام کی کوششوں کو دھچکا لگے گا، پوری قوم کو فیصلے سے سخت مایوسی ہوئی ہے۔

فیصلے کو عدالت میں چیلنج کریں گے ۔ انہوں نے کہا کہ اب پی ٹی آئی کو بھی سوچنا ہوگا کہ ملک میں انسانی حقوق اور رول آف لاء کیلئےکیا لائحہ عمل اختیار کرنا ہے کیونکہ ایسے ماحول میں ملک ترقی نہیں کر سکتا۔

القادر ٹرسٹ بنانا اتنا بڑا جرم نہیں تھا جس میں عمران خان کو 14 سال اور ان کی اہلیہ بشریٰ بی بی کو 7 سال کی سزا سنائی جائے۔ انہوں نے کہا کہ فیصلہ تو پارٹی کرے گی مگر میرے خیال میں اب حکومت سے مذاکرات کرنے کا کوئی فائدہ نہیں۔

شوکت یوسفزئی نے کہا کہ بد قسمتی سے توشہ خانہ سے قیمتی گاڑیاں لے جانے والے اور منی لانڈرنگ کر کے باہر جائیدادیں بنانے والے آج آزاد گھوم رہے ہیں اور حکومت میں ہیں۔

یہ بھی پڑھیں:عمران خان کی 190 ملین پاؤنڈ کیس میں سزا کا کریڈٹ عوام کی بددعاؤں کو جاتا ہے، حسن ایوب

ملک کا نام روشن کرنے اور اپنا سب کچھ ملک کو دینے اور عوام کی آزادی کی جدوجہد کرنے والے عمران خان کو 14 سال سزا دی گئی۔ اس سے دنیا بھر میں پاکستان کی بدنامی اور جگ ہنسائی ہوگی۔