روپے کی قدر میں بہتری، ڈالر کی قیمت میں معمولی کمی

انٹربینک مارکیٹ میں جمعرات کے روز کاروبار کے آغاز پر پاکستانی روپے کی قدر میں بہتری دیکھنے میں آئی جبکہ امریکی ڈالر کی قیمت میں 0.1 فیصد کمی ریکارڈ کی گئی۔ ڈالر 29 پیسے سستا ہو کر 278.56 روپے پر آ گیا۔

اسٹیٹ بینک آف پاکستان کے مطابق بدھ کے روز ڈالر 278.85 روپے کی سطح پر بند ہوا تھا۔ دوسری جانب، عالمی کرنسی مارکیٹ میں امریکی ڈالر دیگر اہم کرنسیوں کے مقابلے میں مستحکم رہا، تاہم گزشتہ دو دنوں کی طرح سست روی برقرار رہی۔

یہ بھی پڑھیں: انسانی سمگلنگ میں ملوث بین الاقوامی ایجنٹوں کی گرفتاری ،ایف آئی اے اور انٹرپول کی کاروائیاں جاری

ماہرین کا کہنا ہے کہ آئندہ ہفتے مختلف ممالک کے مرکزی بینکوں کے پالیسی فیصلوں کے اثرات کرنسی مارکیٹ پر پڑ سکتے ہیں، جن میں جاپان، امریکہ اور یورپی مرکزی بینک شامل ہیں۔ ادھر، امریکی صدر ڈونلڈ ٹرمپ کی جانب سے کینیڈا اور میکسیکو پر 25 فیصد جبکہ چین پر یکم فروری سے 10 فیصد اضافی محصولات عائد کرنے کی تجویز دی گئی ہے۔ مزید یہ کہ یورپی درآمدات پر ممکنہ محصولات کے اشارے بھی سامنے آئے ہیں جس کے باعث عالمی اقتصادی ماہرین اس کے اثرات کا جائزہ لے رہے ہیں۔