ملک کے آئندہ مالی منصوبے اور بجٹ تجاویز کے حوالے سے حکومت اور پیپلز پارٹی کے درمیان جاری مشاورت میں فی الحال کوئی حتمی پیش رفت سامنے نہیں آئی۔
ذرائع کے مطابق دونوں فریقوں کے درمیان مذاکرات کے اگلے دور کی توقع کی جا رہی تھی، تاہم یہ نشست طے نہ ہو سکی اب امکان ظاہر کیا جا رہا ہے کہ حکومت اور پیپلز پارٹی کے نمائندوں کے درمیان باضابطہ اجلاس آج اتوار کے روز منعقد ہوگا، جس میں بجٹ سے متعلق اہم امور پر تفصیلی تبادلۂ خیال کیا جائے گا۔
ذرائع کا کہنا ہے کہ حکومت اس وقت پیپلز پارٹی کے مشاورتی اجلاس کے نتائج کا انتظار کر رہی ہے، پیپلز پارٹی اپنی اندرونی مشاورت میں بجٹ تجاویز، عوامی فلاح کے منصوبوں، ترقیاتی اخراجات اور دیگر مالی معاملات پر غور کر رہی ہے، اس اجلاس میں پارٹی قیادت اور متعلقہ رہنما مختلف تجاویز کا جائزہ لے کر اپنی حتمی رائے مرتب کریں گے۔
اطلاعات کے مطابق پیپلز پارٹی کے مشاورتی اجلاس میں ہونے والے فیصلوں سے حکومتی ٹیم کو آگاہ کیا جائے گا تاکہ آئندہ باضابطہ مذاکرات میں ان نکات کو زیر بحث لایا جا سکے،سیاسی حلقوں کا خیال ہے کہ بجٹ کی منظوری اور اس سے متعلق اہم فیصلوں میں دونوں جماعتوں کے درمیان ہم آہنگی اہم کردار ادا کرے گی۔
حکومتی ذرائع کے مطابق حکومت پیپلز پارٹی کے ساتھ مسلسل رابطے میں ہے اور جب بھی پیپلز پارٹی ملاقات کی خواہش ظاہر کرے گی، حکومتی نمائندے بجٹ کے مختلف پہلوؤں پر مکمل بریفنگ دینے کے لیے تیار ہوں گے۔
ذرائع کا مزید کہنا ہے کہ حکومت بجٹ کی تفصیلات اور مجوزہ اقدامات کے بارے میں اتحادی جماعتوں کو اعتماد میں لینے کی پالیسی پر عمل پیرا ہے تاکہ اہم قومی معاملات پر اتفاق رائے پیدا کیا جا سکے۔
آئندہ متوقع اجلاس میں عوامی ریلیف، ترقیاتی منصوبوں، محصولات کے اہداف اور دیگر مالی امور پر تفصیلی گفتگو ہونے کا امکان ہے۔ اس ملاقات کے نتائج نہ صرف بجٹ کی حتمی شکل پر اثر انداز ہو سکتے ہیں بلکہ حکومتی اتحاد کے مستقبل کے تعاون کے حوالے سے بھی اہم تصور کیے جا رہے ہیں۔
اس لیے تمام نگاہیں اتوار کو متوقع اس باضابطہ اجلاس پر مرکوز ہیں، جہاں دونوں فریق اپنے مؤقف پیش کرتے ہوئے آئندہ کے لائحۂ عمل پر اتفاق رائے پیدا کرنے کی کوشش کریں گے۔
By 
