پاکستان کا فتح سیریز  کے میزائل کا کامیاب تجربہ

پاکستان نے زمین سے زمین تک مار کرنے والے فتح سیریز کے میزائل کا کامیاب تجربہ کیا ہے، فتح سیریز کا یہ میزائل 120 کلومیٹر دور زمین سے زمین تک اپنے ہدف کو درست نشانہ بنانے کی صلاحیت رکھتا ہے۔

پاک فوج کے شعبہ تعلقات عامہ (آئی ایس پی آر) کی جانب سے جاری اعلامیے میں کہا گیا ہے کہ پاکستان کے دفاعی انجینیئرز کی کامیاب کاؤشوں کے نتیجے میں پاکستان کے زمین سے زمین تک مار کرنے والی میزائل سیریز ’فتح‘ کے میزائل کا کامیاب تجربہ کیا گیا ہے، جس نے 120 کلومیٹر دور اپنے ہدف کو کامیابی کے ساتھ نشانہ بنایا ہے۔

میزائل کے تجربے کی اس تقریب میں پاک فوج کے سینئر افسران کے علاوہ پاکستان کی اسٹریٹجک اداروں کے افسران، سائنسدانوں اور انجینیئرز نے بھی شرکت کی۔ فتح میزائل جدید نیوی گیشن، آپریشنل اور ٹیکنیکل صلاحیتوں پر مبنی ہے۔ میزائل تجربے کا مقصد فوجیوں کی آپریشنل تیاری کو یقینی بنانا اور میزائل کے جدید نیویگیشن سسٹم اور بہتر درستی سمیت اہم تکنیکی پیرامیٹرز کی توثیق کرنا تھا۔

میزائل کے کامیاب تجربے پر صدر، وزیراعظم اورچیئرمین جوائنٹ چیفس آف اسٹاف کمیٹی، آرمی چیف نے ملکی دفاع میں ایک اور سنگ میل حاصل کرنے پر پاک فوج کے اسٹریٹجک اداروں اور انجینیئرز کو مبارک باد دی ہے۔ تجربے کا مقصد فوجی تیاری اور تکنیکی صلاحیت کی جانچ ہے۔

فوجی قیادت نے پاکستان کی علاقائی سالمیت کے خلاف کسی بھی جارحیت کو ناکام بنانے کے لیے پاک فوج کی آپریشنل تیاریوں اور تکنیکی مہارت پر مکمل اعتماد کا اظہار کیا۔ واضح رہے کہ پاکستان نے 2 روز قبل زمین سے زمین پر مار کرنے والے 450 کلومیٹر رینج کے حامل ابدالی میزائل کا بھی کامیاب تجربہ کیا تھا، آئی ایس پی آر نے بیان میں کہا ہے کہ پاک فوج دشمن کی کسی بھی جارحیت کا منہ توڑ جواب دینے کی بھرپور صلاحیت رکھتی ہے۔