پاکستان کی سالمیت اور خود مختاری کی حمایت جاری رکھیں گے: چینی وزیرخارجہ کی اسحاق ڈار سے گفتگو

چین کے وزیرخارجہ وانگ ژی نے وزیر خا رجہ اسحاق ڈار سے ٹیلیفونک پر گفتگو میں پاکستان اور بھارت سے دیرپا جنگ بندی کیلئے مشاورت اور سفارتی حل پر زور دیا ہے۔

دوران گفتگو چینی وزیر خارجہ نے کہا کہ چین ہر حال میں پاکستان کی خودمختاری اورسالمیت کیساتھ کھڑا ہے ۔ دوسری جانب چینی وزیر خارجہ نے بھارتی قومی سلامتی کے مشیر اجیت دوول سے بھی رابطہ کیا جس میں ان کا کہنا تھا کہ دونوں ممالک مذاکرات سے مسائل حل کریں اور کشید گی سے گریز کریں ۔

یہ بھی پڑھیں:بنگلہ دیش کی سابق وزیراعظم شیخ حسینہ واجد کی جماعت عوامی لیگ پر پابندی عائد کر دی گئی

چینی وزارت خارجہ نے اپنے بیان میں بتایا کہ مشیر بھارتی قومی سلامتی اجیت ڈوول نے گفتگو میں بتایا کہ پہلگام حملے میں بھارتی اہلکارہلاک ہوئے، اس ضمن میں ہمیں دہشت گردی کے خلاف کارروائی کرنا پڑی ۔ اجیت ڈوول نے بتایا کہ جنگ بھارت کا چناؤ نہیں تھا، پاکستان اور بھارت جنگ بندی کے لئے پُرعزم ہیں۔

چینی وزارت خارجہ کا کہنا ہے کہ پہلگام حملے سمیت ہر قسم کی دہشت گردی کی مخالفت کرتے ہیں، بھارت اور پاکستان ہمسایہ ممالک ہیں انہیں خطے کے امن اور استحکام کو خطرے میں نہیں ڈالنا چاہیے۔ خیال رہے کہ ہندوستان کی جارحیت پر پاکستان نے منہ توڑجوا ب دیااور آپریشن بُنْيَان مَّرْصُوْص کے دوران بھارت میں 10 سے زائد اہداف کو نشانہ بنایا ۔

آدم پور، ادھم پور، بٹھنڈا، سورت گڑھ، مامون، اکھنور، جموں، سرسہ اور برنالہ کی ائیر بیسز اور فیلڈز کو تباہ کیا، بھارت کی اڑی فیلڈ سپلائی ڈپو، سرسہ اور ہلواڑا ائیر فیلڈز بھی تباہ کیں۔

یہ بھی پڑھیں:آئندہ بھارت پر کوئی حملہ ہوا تو اس کو جنگ تصور کیا جائے گا، نریندر مودی

پاکستان نے فتح ون میزائل سسٹم کے ذریعے متعدد بھارتی اہداف کو نشانہ بنایا، آدم پور میں پاک فوج نے جے ایف 17 تھنڈر سے بھارتی ائیر بیس پر ہائپر سونک میزائل سے ڈیڑھ ارب ڈالر مالیت کا ائیر ڈیفنس سسٹم ایس 400 تباہ کردیا۔ پاکستان کی جوابی کارروائی کے بعد دونوں ممالک جنگ بندی پر رضامند ہو گئے ۔